पत्रकारतय् पेशागत सुरक्षा यायेत माग

येँ (नेपालभाषा टाइम्स) – पत्रकारिता ख्यःलिसे सम्बन्धित थीथी संघसंस्थां पत्रकारतय् पेशागत सुरक्षा जुइमाःगु माग याःगु दु। नेपाल आदिवासी जनजाति पत्रकार महासंघ (फोनिज), संचारिका समूह, जागरण मिडिया सेन्टर लगायत पत्रकार ख्यःलिसे सम्बन्धित झिगू संघसंस्थां उकथं पेशागत सुरक्षा जुइमाःगु माग याःगु खः ।

इपिं संघसंस्थां विज्ञप्ती जारी यासे पत्रकारया पेशागत सुरक्षा यायेत सरकारलिसे माग यासें लिपांगु इलय् संचार गृहं थीथी त्वह तयाः पत्रकारत लिकया छ्वयेगु, तलब क्वपालेगु याःगु खँय् नं थःपिनिगु ध्यानाकर्षण जूगु धाःगु दु।

संघसंस्थां कोरोना महामारीया इलय् उकिया नियन्त्रणया निंतिं सही सूचना बियाः जिम्मेवारीपूर्ण भूमिका म्हितूपिं मिसा, आदिवासी जनजाति, दलित, मुस्मां मधेशी, अपांगता जूपिं समुदायया पत्रकार व संचारगृहया निंतिं सरकारं विशेष राहत प्याकेजया घोषणा यायेत नं माग याःगु दु ।

अथे हे सरकारं विगतय् अनुदान बिया वयाच्वंपिं पत्रकारया अप्वःथें संस्थायात उपेक्षा यानाः सीमित संस्थायात जक अनुदान बीगु यानाच्वंगु नं विज्ञप्तीइ धयातःगु दु ।