प्रमज्यू इलय् हे चिउताः तये माली !

सरकारी नेतातय्सं थौं समृद्धिया ततःधंगु नारा बी । देशं आः विकासया गति काये धुंकल । समृद्धिया रथ न्ह्यायेधुंकल । देशं आः लिफः स्वइ मखुत । देय् आः एकचित्तं उन्नतिया लँय् न्ह्याः वनी । वनां च्वनी । सुना. पने फइमखु। जनता थ्व खँय् धुक्क जूसां जिउ । सरकारी नेतातय्सं दावा याइ । जनतायात विश्वास बी । बीत स्वइ । विकासया आकाशवाणी थ्वयाच्वंगु ताइ । विकास, समृद्धि धाःपिं गज्याःपिं झंगःत खः, जनतां आकाशय् थ थ स्वइ । विकास, समृद्धिया झंगः खंकेत स्वइ । प्वंगु आकाशय् तर मात्र सुपाँय् या कुचाकाचा खनी । बोहरीं बखुंचित लिनाच्वंगु दृश्यत खनी । छ्यं च्वय् ह्वांग शुन्य खाली आकाश दइ । खनी ।

थौं जनता अन्योलय् । छखें सरकारी नेतृत्व पक्षं देय् समृद्धिय लँय् दत्तचित्त । शंखनाद थ्वयेकी । नगरा थाइ । मेखेर अखबारत ब्वने । देय् थौं भ्रष्टाचारय् चुर्लम्म । अनियन्त्रित भ्रष्टाचारं देय् थौं भचाभुंग, लथालिंग स्थितिइ । प्यखेरं चिन्ता व्यक्त जुइ । याइ । मखु थ्व भ्रष्टाचारया द्वपं प्रधानमन्त्रीजुं धाःथें मुटु मदुपिं पत्रकारतय् सरकारयात बदनाम यायेगु षडयन्त्र जक खःला ? वा सरकारया समृद्धि, विकासया रंगीन खँग्वःत भ्रष्टाचारयात सुचुकेगु आकर्षक खोल जक खः ?

प्रधानमन्त्रीजुं हालय् व्यक्त याइ थौं देशय् खने दयाच्वंगु भ्रष्टाचारया चर्चा भ्रष्टाचारया वृद्धिया कारणं मखु, सरकारं भ्रष्टाचारया विरोधय् काःगु कठोर पलाःया कारणं खः । सरकारं भ्रष्टाचारप्रति शुन्य सहनशीलता क्यनी । भ्रष्टाचार निर्मूल जुइ । प्रमजुं आश्वस्त याइ ।

छखे प्रमजुया आश्वासन । मेखेर आम जनताया नुगलय् विश्वासया संकट । सरकारी आश्वासनं मन थकाये फइगु स्थिति मदु थौं जनताया । भ्रष्टाचारया अन्तर्राष्ट्रिय प्रतिस्पर्धाय् नेपाः स्थान न्ह्यःने । ट्रान्सपरेन्सी इन्टरनेशनलया रिपोर्टं धाइ । थज्याःगु हे उपलब्धियातकयाः हे थौं सरकारं देय् विकास, समृद्धिया लँय् द्रुतगतिं न्ह्याः वनेधुंकूगु धाःगु खः ला ?

नेपालय् थौं भ्रष्टाचार व्याप्त धइगु खँ अन्तर्राष्ट्रियस्तरया भ्रष्टाचार सम्बन्धी अध्ययन, विश्लेषणं धयाच्वंगु दु। विकास, समृद्धिया भजन हालां जक मगाः । भ्रष्टाचारं ग्रस्त विकास, समृद्धि देय्, जनताया निंतिं लाभदायक जुइमखु। खुँ, दाखुँ, देशद्रोही, जनविरोधीतय् जक थ्वं पक्षपोषण याइ ।

सरकारी आश्वासनं मन थकाये फइगु स्थिति मदु थौं जनताया । भ्रष्टाचारया अन्तर्राष्ट्रिय प्रतिस्पर्धाय् नेपाः स्थान न्ह्यःने। ट्रान्सपरेन्सी इन्टरनेशनलया रिपोर्टं धाइ ।

थौंकन्हय् देशय् ललिता निवासया जग्गा प्रकरण चर्चाय् वयाच्वंगु दु। देशय् ततःधंपिं न्यात नं थ्व प्रकरणया जालय् लाःगु दु। भ्रष्टाचारया खँय् उच्चस्तरीय राजनीतिक, प्रशासनिक ख्यःया मनूत गुलि निश्चिन्त, निसंकोच संलग्न जुयाच्वंगु दु धइगु तथ्यया थ्व छगू प्रमाण खः । नमूना खः । राजनीतिक, प्रशासनिक शक्तिया लिधंसाय् देशय् थौं छु याये जिउ, छु याये मजिउया सीमा पुलेधुंकल । थौं देशय् अल्याख सार्वजनिक जग्गा, पर्ती ख्यः, चौर, गुथिया जग्गा, व्यक्तिगत जग्गात माफियातय् स्वामित्वय् लाइ । राजनीतिक, प्रशासनिक केन्द्रतय् मिलोमतों थौं देशय् न्ह्यागु नं कुकर्म, अपराध यायेगु सम्भव जुइ ।

ललिता निवास जग्गा प्रकरणं देशय् भ्रष्टाचार विरोधय् आः छुं ठोस कारवाही जुइ ला? भ्रष्टाचार याःसा आः उच्चस्तरीय राजनीतिक, प्रशासनिक व्यक्तित्वत नं बचे जुइ मखुला? जनताय् ललिता निवास प्रकरणं सन्देश बी ला? तर । थौं देशय् जनताया नुगः थुलि क्वतुने धुंकल कि उलि याकनं अन आशा लुइगु सम्भावना मदु। ललिता निवास प्रकरणय् लाःपिनिगु मुद्दा अदालत थ्यनेधुंकल । भ्रष्टाचारया पर्दाफास अदालतं याइ, यानाबी । कानुनी प्रक्रियां धाइ । तर थौं उच्चस्तरीय स्वतन्त्र संवैधानिक अ·त नं राजनीतिकरणं ग्रस्त जुइधुंकल । अनं निष्पक्ष निर्णय वइ धइगु विश्वास जनतां काये फइगु स्थिति थौं देशय् मदु।

अझ देय्या प्रमुख दलत भागबन्डाया खँय् आम सहमतिया नामय् राजनीतिक भ्रष्टाचार यायेत लिफः स्वइमखु। लेनदेनया खँय् प्रमुख दलतय् दथुइ ‘तैं चुप, मै चुप’ धायेगु चलन हावी जुइ । सिद्धान्त, नैतिक जिम्मेवारी स्वयां अनुकूलता, स्वार्थया सिद्धान्तं थौं देशय् राजनीतिक दलत उत्पे्ररित जुइ । देशय् भ्रष्टाचार राजनीतिक संरक्षणय् जुयाच्वंगु दु धइगु विश्वासं अदालतया निष्पक्षताय् नं थौं जनता धुक्क जुइ मफइगु स्थिति दु। भ्रष्टाचारया किटाणु थौं देय्या हर ख्यलय् दुहां वनेधुंकल । राजनीतिक, प्रशासनिकीयात भ्रष्टाचारं दूषित यायेधुंकल । भ्रष्टाचारया दृष्टिं देय् थौं अराजक स्थितिइ लायेधुंकल ।

अखबारय् ब्वने । सांसदतय्सं ध्यबा कयाः सांसद पद नं मीत तयार । थ्व राजनीतिक भ्रष्टाचार मखुला ? अथे हे लोकसेवाय् उत्कृष्ट स्थानय् वःपिंसं नं थःगु उत्कृष्ट अवसरयात मोलतोल यानाः मीत स्वइ । हर ख्यलय् पदोन्नतिया लागि मोलतोल जुइ हँ ! ब्रिफकेशया चलखेल जुइ धाइ । नक्कली सर्टिफिकेटया न्ह्यसः थनी । गुलिखे डाक्टरतय्त कुनिी । लिपा फासांफुसुं जुइ । थथे हे जूसा भ्रष्टाचार देय्या असाध्य ल्वय् जुइ । ललिता निवास प्रकरणय् खने दुगु भ्रष्टाचार लक्षण जक खः । खने मदुगु भ्रष्टाचारं देय्यात दुने दुनें भ्वाभः याइ । प्रमज्यू इलय् हे चिउताः तये माली !

सम्बन्धित बुखँ

LEAVE YOUR COMMENTS