ने. सं. ११४४ ञलागा पारू -

प्रमजु देय् सकसिगुं खः !

मय्जु डा. दिव्या सिंह शाह । प्रम ओलीजुया निजी चिकित्सक । प्रमजुया जँलास्येँया उपचारय् प्रत्यक्ष संलग्न डाक्टर । हालय् प्रमजुया जँलास्येँया प्रत्यारोपण जुइ । प्रमजुया स्वास्थ्य स्थिति बारे जानकारी बीकथं डा. शाहया टेलिभिजनय् अन्तर्वार्ता वइ । न्यने । अन्तर्वार्ताय् डा. शाहं प्रमजुया जँलास्येँया प्रत्यारोपण सफल जूगु खँ धाइ । स्वास्थ्यय् थथे हे द्रुत गतिं सुधार जुया वन धाःसा प्रमजु स्वास्थ्य लाभ यानाः याकनं हे छेँय् लिहां वनीगु विश्वास बी । प्रमजुया अस्वस्थतां देय्या आम जनतायात चिन्ता जुइगु स्वाभाविक ।

थौंया सन्दर्भय् केपी ओलीजु सामान्य व्यक्ति जक मखु। राज्यया सम्पूर्ण जिम्मेवारी बहन यानाच्वंम्ह प्रधानमन्त्री । प्रमया अस्वस्थतायात कयाः उकिं मानवीयताया नामं जक सुस्वास्थ्यया कामना यानां मगाः । गाइ मखु। देय्या अवस्थाय् नं छुं अप्रिय लिच्वः मलायेमा धकाः नं सरकार प्रमुख प्रमजुया शिघ्र स्वास्थ्य सुधारया कामना याये मालबी ।

प्रम ओलीजुया स्वास्थ्योपचारया इलय् वय्कःया इच्छाशक्ति व मनोबलयात कयाः तसकं हे बय्बय् जुइ । न्यने दु, प्रधानमन्त्रीजुं जँलास्येँ प्रत्यारोपण यायेत अस्पताल वने न्ह्यः सुयातं कार्यवाहकया जिम्मेवारी मबिउ । पूर्ण प्रधानमन्त्रीया हैसियतं हे प्रम ओलीजु अतिकं जोखिमपूर्ण प्रत्यारोपणया निंतिं तयार जुइ । शल्यक्रियाय् संलग्न जुइ । प्रत्यारोपणया संकटया घडीइ नं सफलता थःगु पक्षय् निश्चित धइगु गुगु दृढ इच्छाशक्ति प्रमजुं क्यनी, उकिं प्रमजुया आत्म शक्तियात भ्याः भचा हे क्षीण याके बीमखु ।

अस्पतालय् स्वास्थ्य लाभ यानाच्वंम्ह स्वयं प्रधानमन्त्रीं प्रत्यारोपण लिपा आः कमसे कम १५ दँया निंतिं थः स्वस्थ जुइगु विचाः प्वंकी । प्रमजुया महत्वकांक्षा क्वातुइ ।

प्रमजु निश्चिन्त जुयाः शल्यक्रिया यायेगु बेडय् ग्वतुली । थ्व सन्दर्भय् प्रमजुया नीजि चिकित्सकं थःगु अन्तर्वार्ताय् धाःगु छता रोचक खँ लुमनी । प्रत्यारोपण याये न्ह्यः प्रमजुया शरीरया सम्पूर्ण अंगतय् परीक्षण जुइ । याइ । थज्याःगु परीक्षण अनिवार्य जुइ । आश्चर्य ! तिथिमिति कथं (क्रोनोलोजी) प्रमजुया उमेर ६९ दँया जुइधुंकूसां वय्कःया गुलिखे अंगतय् जैविक (बायोलोजिकल) उमेर स्वीदँ, पीदँया तिनि खनेदइ । ताजा, स्वस्थ । प्रमजुया समस्या जँलास्येँया खः । आः स्वीदँ दुम्ह भिंचा मय्जुया जँलास्येँया प्रत्यारोपण जुइ । प्रमजुया न्हूगु जँलास्येँया जैविक उमेर नं युवा अवस्थाया हे जुइ । प्रत्यारोपण लिपा प्रमजुया जैविक (बायोलोजिकल) उमेरकथं ल्याय्म्ह जुइ । उपचारय् संलग्न चिकित्सकतय्सं धाइ । अस्पतालय् स्वास्थ्य लाभ यानाच्वंम्ह स्वयं प्रधानमन्त्रीं प्रत्यारोपण लिपा आः कमसे कम १५ दँया निंतिं थः स्वस्थ जुइगु विचाः प्वंकी । प्रमजुया महत्वकांक्षा क्वातुइ ।

प्रम ओलीजुया क्वचाःगु जँलास्येँ प्रत्यारोपणया क्रियां देशय् महत्वपूर्ण राजनीतिक सन्देश थ्वयेकूगु खनेदु। विविध विचाः व प्रतिक्रियात पिज्वइ । प्रम ओलीजुं थःगु जँलास्येँया प्रत्यारोपण विदेशय् वनाः मयाः । स्वदेशय् हे यात । प्रमजुया थ्व निर्णयं वय्कःया विशाल राष्ट्रवादी सोचयात प्रष्ट याइ । प्रमजुया उपचारय् संलग्न छम्ह चिकित्सक डा. उत्तमकुमार शर्मां व्यक्त याइ । अन्ततः थःगु देशय् हे आवश्यक उपचार यायेगु प्रमजुया निर्णयं वय्कःयात राजनीतिक लाभ बी । प्यखेरं चर्चा जुइ ।

गुलिसिनं धाइ प्रमजुं न्हापा न्हापाया उपचार विदेशय् वनाः याःगु खः । राष्ट्रय धुकुतिं उपचार खर्च काःगु खः । आम जनता अबलय् थ्व खँय् प्रधानमन्त्रीजुया गाक्कं आलोचना याइ । उकिं थ्व पटकय् जन दबावयात ध्यानय् तयाः प्रमजु स्वदेशय् उपचार यायेगु खँय् मजबुत जुइ । बाध्यतावस, थौं प्रमजु! ‘मजबुरीका नाम गान्धी जुइ ।’ विश्लेषण याइपिं नं दइ ।

प्रमजुं देय्या चिकित्सकतय्त तःधंगु विश्वास यात। उकिया निंतिं चिकित्सक संघं प्रमजुयात आभार व्यक्त याइ । स्वदेशी चिकित्सकप्रति आम जनमानसय् विश्वासया संकट दयाच्वंगु इलय् प्रमजुं स्वेदशी डाक्टरतय्त पत्याः यात। स्वदेशी डाक्टरतय् मनोबल वृद्धि यानादिल । चिकित्सक संघं लसता प्वंकी । प्रमजुया जँलास्येँया सफल प्रत्यारोपणं नेपाःया चिकित्सकतय् दक्षताया सन्देश विश्वय् न्यना वंगु दु। गौरवया सः थ्वयेकीपिं नं खनेदइ । विचारणीय खँ । प्रमजुया स्वदेशय् जूगु सफल उपचारया सिलसिलाय् गुगु राष्ट्रवाद, मनोबल, गर्वबोध, सम्मानबोधया चर्चा जुल व थःथःगु थासय्, सन्दर्भय् इपिं महत्वपूर्ण जुइफु । जुइ ।

तर न्ह्यसः दनी, गम्भिर न्ह्यसः । देशय् थौं दुगु चिकित्सा, उपचारया सुविधा आम जनतां थःगु सम्मान, मनोबल, राष्ट्रवाद, सुरक्षा अनुभव याये फयाच्वंगु दु ला? देय् व जनताया सन्दर्भय् अतिकं महत्वपूर्ण, जायज न्ह्यसः खः थ्व । थौं सामान्य उपचार याये मखनाः मनूत सिनाच्वंगु दु। छेँ-बुँ मियाः विदेशय् उपचारया निंतिंगुलिखे मनूत वनेत बाध्य । आर्थिक अभावं जनता उपचारं बञ्चित । देशय् स्वास्थ्योपचारया सुविधा गुलि दत ? दक्ष चिकित्सक गुलि दु? आम जनताया निंतिं उकिया अर्थ शुन्य जुइ । जबतक इपिं जनताया पहुँच पिने लाइ प्रमजु! देय् सकसिगुं खः ।