संसदया समिति कालापानी वनीगु

ये – भारतं नकतिनि जारी याःगु थःगु देशया नक्साय् अतिक्रमण यानाः कयातःगु नेपाःया कालापानी क्षेत्रया अवलोकन यायेगु लागिं संसदया राज्य व्यवस्था समिति थःहे कालापानी वनीगु जूगु दु । समितिया अध्यक्ष शशि श्रेष्ठया सभापतित्वय् म्हिगः च्वंगु बैठकं थ्व निर्णय याःगु खः ।

उगु समितिं थ्व स्वयां न्ह्यः भारतं थःगु यानाः काःगु नेपाःया भूभाग लित कायेगु लागिं पहल या धकाः नेपाः सरकारयात निर्देशन बिउगु खः । समिति कालापानी गबले वनी धइगु खँ धाःसा आइतवाः च्वनीगु बैठक क्वःछी धाःगु दु । थ्व समितिं मंसीर ४–५ गतेपाखे हे कालापानी वनेगु तयारी याःगु खः ।

तर उकिया लागिं मालीगु खर्च निकासा यायेत सभामुखया स्वीकृति माःगु व आः सभामुख मदुगु जुयाः ज्या मन्ह्याःगु खः । आः थ्व ज्या उपसभामुख शिवमाया तुम्बाहाम्फें यायेगु कथं खँ मिले याःगु दु ।

थ्व पुचः कालापानी वनाः महाकाली खुसिया उद्गमस्थल तक हे थ्यंकीगु खँ धाःगु दु । समितिया पुचःयात अन वनेत हेलिकप्टरया व्यवस्था यायेत नेपाली सेनायात इनाप याःगु दु । संसदीय समिति कालापानी हे थ्यंकाः मुंका हइगु जानकारी व सुझाव सदनय् पेश याइगु खँ धाःगु दु ।