दार्चुला घटनायात कयाः युवा संघया प्रदर्शन

येँ -दार्चुलाय् तुइन च्वनाः वनेगु झ्वलय् महाकाली खुसीइ बेपत्ता जूम्ह जयसिंह धामीया घटनायात कयाः नेपा एमाले माधव नेपाल पुचःया युवा संघं म्हिगः येँय् च्वंगु भारतीय दूतावासय् विरोध प्रदर्शन याःगु दु ।

विरोध प्रदर्शनया झ्वलय् युवापिसं ‘भारतीय विस्तारवाद मुर्दावाद, जयसिंह महरायात स्याःपिंत म्हसिकाः कारबाही यायेमाः, नेपाःमिपिंत भारतीय एसएसबी यानाच्वंगु ज्यादती बन्द यायेमाः, जयसिंह महरा सीगु मखु स्याःगु खः, महराया छेँजःपिंत राहतया व्यवस्था याः’ आदि नारा दुगु प्लेकार्ड सहित भारतीय दूतावास न्ह्यःने प्रदर्शन याःगु खः ।

भारतीय सीमा सुरक्षा बलं तुइन चानाबिउगुलिं नेपाःया ल्याय्म्ह बेपत्ता जूगु धासें संघं घटनाया छानविन यानाः दोषीयात कारबाही यायेमाःगु माग नं याःगु दु । वंगु शुक्रवाः दार्चुलाय् तुइन च्वनाः सदरमुकाम खलंगापाखे वयेगु झ्वलय् भारतीय सीमा सुरक्षा बलं तुइन च्यानाबिउगुलिं महरा महाकाली खुसीइ कुतुंवनाःबेपत्ता जूगु खः । भारतं धाःसा एसएसबी तुइन मचानागु दावी याना वयाच्वंगु दु ।

थ्वहे झ्वलय् गृहमन्त्री बालकृष्ण खाँडं तुइनय् च्वनाः वनेगु झ्वलय् दुर्घटनाय् लाःगु घटनायात कयाः सरकार गम्भीर जूगु खँ धयादीगु दु । म्हिगः राष्ट्रियसभाया बैठकय् जानकारी याकेगु झ्वलय् वय्कलं उगु खँ धयादीगु खः । वय्कलं घटनाया बारे छानविन यायेत समिति नीस्वने धुनागु खँ कनादिसें समितिया प्र्रतिवेदन कथं सरकार पलाः ल्ह्वनेगु खँ नं धयादीगु दु ।

सम्बन्धित बुखँ

LEAVE YOUR COMMENTS