येँ -बागमति प्रदेशया मन्त्रिमण्डलय् येँया सांसद रामेश्वर फुयाँलयात भौतिक योजना तथा विकास मन्त्री दयेकेगु मुख्यमन्त्री डोरमणि पौडेलया योजना ताः मलाइगु खँ सूत्रं धाःगु दु । सांसद फुयाँलयात मन्त्रिमण्डलय् सामेल यासें म्हिगः न्हिनय् ४ बजे सपथ ग्रहण याकेगु कथं मुख्यमन्त्री पौडेलं तयारी याःगु खःसां बालुवाटारं तप्यंक हस्तक्षेप यासें फुयाँलयात मन्त्री मदयेकेत निर्देशन बिउगु खँ सूत्रं धाःगु दु ।
सूत्रया कथं बागमति प्रदेशय् नेकपाया सचेतक समेत जुयादीम्ह फुयाँलं थौंकन्हय् म्हिताच्वंगु संसदीय भूमिका प्रति पार्टी सन्तुष्ट मजूगुलिं वय्कःया मन्त्रीया सपथ ग्रहण समेत स्थगित जूगु खः ।
फुयाँलयात मन्त्री दयेके मजिउ धकाः बागमति प्रदेशया पार्टी इञ्चार्ज अष्टलक्ष्मी शाक्यं नं प्रधानमन्त्री लिसें पार्टी अध्यक्ष केपी ओलीयात लबिङ यानादीगु खः । मुख्यमन्त्री पौडेलं तत्कालीन मन्त्री केशव स्थापितयात बर्खास्त यायेधुंकाः मन्त्रीविहिन जुयाच्वंगु भौतिक योजना मन्त्रालय फुयाँलयात बीगु निर्णय यानादीगु खः ।
मुख्यमन्त्री पौडेलं मन्त्री नियुक्त यायेत्यंम्ह फुयाँल अप्वः महत्वाकांक्षी जूगु व पार्टी लगायत जनमानसय् तकं अलोकप्रिय जूगुलिं वय्कःयात मन्त्री दयेकल धाःसा पार्टीया छबीइ तकं लिच्वः लाइ धासें बालुवाटारं वय्कःया सपथ ग्रहण दिकेत निर्देशन बिउगु खँ सूत्रं धाःगु दु ।
सूत्रया कथं फुयाँलयात मन्त्री दयेकल धाःसा प्रदेशया समीकरण स्यनाः प्रदेश सरकारया विरोधय् अविश्वासया प्रस्ताव समेत दर्ता जुइ फइगु सम्भावना अप्वयेवं मुख्यमन्त्री पौडेल नं सपथ ग्रहण याकेगु ज्यां लिचिउगु खः ।
LEAVE YOUR COMMENTS