ने. सं. ११४४ ञलाथ्व दशमी -

विमान दुर्घटनाय् सीपिं ४६ थ्यन

घटनास्थलय् वनाः प्रमपाखें जानकारी काल

येँ–त्रिभुवन अन्तर्राष्ट्रिय विमानस्थलय् विमान दुर्घटनाय् लानाः सीपि ४६ थ्यंगु दु । बंगलादेशया राजधानी ढाकां येँया निंतिं वःगु विमान त्रिभुवन अन्तर्राष्ट्रिय विमानस्थलय् अवतरण यायेगु झ्वलय् अनियन्त्रित जुयाः दुर्घटना जूगु खः ।
विमान दुर्घटना लिपा उद्धार याःपिं मध्ये च्याम्ह अस्पतालय् सीगु एसएसपी पूर्णचन्द्र जोशी कनादीगु दु । दुर्घटनाग्रस्त विमानय् ३३ म्ह नेपाःमि नं दुगु खःसा इपिं मध्ये १२ म्ह नेपाःया प्रमुख प्रमुख ट्राभल एजेन्सीया कर्मचारी खः ।
विमानय् दुपिं ट्राभल एजेन्सीया कर्मचारीत दुर्घटनाग्रस्त बंगलादेशया युएस बंगला एअरलाइन्सं ग्वसाः ग्वःगु ज्याझ्वलय् ब्वति कयाः लिहां वयाच्वंपिं खः ।
दुर्घटनाग्रस्त विमानं उद्धार याःपिंत नर्भिक, केएमसी, ओम अस्पतालय् यंकूगु दु । विमानय् निम्ह मस्त, नीच्याम्ह मिसा व पीछम्ह मिजंपिं यात्रुत दुगु नं सीदुगु दु । उकी मध्ये प्यम्ह चालक दलया सदस्य खः ।
थ्व हे झ्वलय् प्रधानमन्त्री केपी शर्मा ओलीं विमान दुर्घटनाया बारे जानकारी कयादीगु दु । त्रिभुवन अन्तर्राष्ट्रिय विमानस्थलय् वनाः वय्कलं घटनाया बारे जानकारी कयादीगु दु । उगु इलय् प्रम ओलीलिसें गृहमन्त्री रामबहादुर थापा व रक्षामन्त्री ईश्वर पोखरेल नं नापं झायादीगु खः ।
प्रम ओलीं घटनायात कयाः दुःख प्वंकादिसें घाःपाः जूपिनिगु वासः सरकारं यायेगु धयादीगु दु । नापं वय्कलं घटनाया बारे छानविन यायेत सरकारं आयोग गठन यायेगु नं धयादीगु दु ।
लिसें वय्कलं घटनायात कयाः थम्हं बंगलादेशया प्रधानमन्त्रीनापं खँ ल्हायेगु कुतः यानागु खःसा सम्भव मजूगु धयादीगु दु ।