सक्वया अश्वमेघ यज्ञ

सक्वय् माघ लछियंकं न्ह्याइगु माधवनारायण (शालीनदी) मेलाया झ्वलय् धलं दंकेगु ज्याझ्वः वंगु सीपुन्हिकुन्हु चछियंकं अश्वमेघ यज्ञ होम यानाः क्वचायेकल ।

मेलाया दकलय् लिपांगु न्हिं अश्वमेघ यज्ञ याइबलय् अश्वया प्रतीककथं सँ दुगु नैंक्याः तयाः होम याइ । थुगु अश्वमेघ यज्ञ याइबलय् धलं दंपिं व्रतालु सकलें न्हिछिचछि द्यां लानाः च्वनेमाःगु तसकं कडागु व क्वातुगु नियम दु। अश्वमेघ यज्ञ याये छन्हु न्ह्यः तेतिस क्वःछि द्यःपिंत शंख पुयाः जाकि ह्वलाः ब्वनेगु चलन दु, थुकी वायुदेव द्यः छम्हेसित निम्ता बीमखु ।

अश्वमेघ यज्ञ यायेबलय् धलं दंपिं सकसिनं चछि जार्गतन पुजा, होम, कलशाचार्य पुजा आदि यानाः श्री स्वस्थानी बाखनय् च्वयातःथें सछि व च्याकू दरं स्वां, सिन्हः, आखें, ग्वय्, ग्वाः, दां, सिदा, पालं घासा, ग्वय्का, पासूका, कलः, ग्वप, पञ्चपल्लबकथं, वंगहः, बःसिहः, पुहः, अँहः, चसिहँः, नापं बय् लि, सतु बलि, तु, कय्गू, कलश, काकचा पु, गोबर व क्वखं मल्हाःगु लः कया हयाः अश्वमेघ यज्ञ यायेमाः गु चलन दु। अथेहे थ्व यज्ञ यायेबलय् नाराद्यःयात इहि यायेगु, बाः¥हाः तयेगु व कय्तापुजानं याइ । थुम्ह द्यःयात अर्ध नारायणेश्वर धाइगु खः ।

अश्वमेघ यज्ञ यानातःगु थासय् (१०८) सछि व च्याचाः चाःहिल धाःसा मनंतुंगु पुवनी धइगु जनबिश्वास दु। अथे जूगुलिं थन यज्ञ स्वयेत वइपिं भक्तजनत नं फुसा १०८ चाः मफुसा छचाः जक जूसां चाः हिलावनी । चछितक अश्वमेघ यज्ञ यानाः क्वचायेकीबलय् थम्हं यज्ञ याःगु इलय् छ्यःगु रुमाल वा कापः जग्गे होम याना छ् वये माःगु चलन दुसा यज्ञ सिधयेवं धलं दंपिं मिसापिंसं (इहिपा याये धुंकूपिंसं) थः भाःयात स्वां बीमाःगु चलन दुसा इहिपा मजूनिपिंसं थः स्वयां थकालिम्हेसित स्वां बीमाःगु चलन दु। स्वां कायेबलय् स्वां काःम्हेसिनं लंपा बीमाः । थनं लिहां वनाः खा महाःनिबलय् पालं यायेमाः ।

खा हालकि पालं याये मजिउ । यज्ञया कन्हय् कुन्हु धलं दंपिं सकलें ज्योतिलि ङ्गेश्वर महाद्यःनापसं च्वंगु सुन्दरी तिर्थय् म्वःल्हुयाः साँवा गणपिंसं शंख पुयाः माःध हाला वनीगु खः । लछितक धलं दंपिं सकलें नादीखुसिइ वनाः थः च्वनागु मि गालय् मिगाः पुजा याना ख्यें कालाः समय् नयेमाः गु चलन दु। थथे मिगाः पुजा सिधयेकाः नयेगु धइगु थनिंनिसें नयेगु सकतां फुके जुल धइगु खः । थुगु अश्वमेघ यज्ञ सछि व च्यागः (कलश) कलः तयाः पुजा याइगु खसा छगः तग्वःगु कलः (ग्वप) इन्द्रकलश धकाः तइ । मेगु सछि व न्हय्गः चिग्वःगु कलः (ग्वप) तइगु खः । चिग्वःगु व तग्वःगु कलखय् तइगु चिं पाइ । तग्वःगु कलः अश्वमेघ यज्ञ सिधयेकाः दरवारय् यंकी ।

किचः सिंह

सम्बन्धित बुखँ

LEAVE YOUR COMMENTS