विश्वरुप देगः दनेत विभागया स्वीकृति

येँ (नेपालभाषा टाइम्स) – पुरातत्व विभागं पशुपतिइ च्वंगु विश्वरुप देगः पुनःनिर्माणया निंतिं स्वीकृति बिउगु दु । विभागं देगः पुनःनिर्माणया ड्रइब डिजाइन स्वीकृत याःगु खः । २०७२ सालं ब्वःगु तःभुखाचं उगु देगः क्षतिग्रस्त जूगु खः । विश्व सम्पदाया धलखय् दुथ्यानाच्वंगु सांस्कृतिक महत्वया सम्पदा पुनःनिर्माणया निंतिं विभागया स्वीकृति कायेमाःगु प्रावधान दु । थ्वयां न्ह्यव विभागं देगः पुनःनिर्माणया ड्रइङ स्वीकृत मयाःगु नापं बजेट तकं व्यवस्थापन जुइ मफयाच्वंगुलिं देगः देगः पुनःनिर्माण याये मफयाच्वंगु खः । विभागं ड्रइङ स्वीकृत यायेवं पशुपति क्षेत्र विकास कोषं विश्वरुप देगः पुनःनिर्माणया निंतिं चालु आर्थिक दँय् १० गू करोड तका दां विनियोजन याःगु दु ।