ने. सं. ११४३ तछलाथ्व दशमी -

आगंछेँ जीर्ण जुइवं कात्ति प्याखं संकटय्

यल – दँय्दसं कात्तिक लछियंकं क्यनीगु अतिकं लोकंह्वाःगु कात्ति प्याखं प्रभावित जुइ फइगु सरोकारवालातय्सं धाःगु दु । थनया कृष्ण द्यःया देगः व पूर्णचण्डि देगःया पुजारी लिसें कात्ति प्याखंया गुरु व गुंपुन्हिया इलय् पिहां वइगु नृसिंह प्याखं खलःया राजोपाध्यायतय् आगंछेँया अस्तित्व संकटय् लायेवं देय्या हे दकलय् ताःहाकःगु कात्ति प्याखं नं संकटय् लाये फइगु इमिसं धाःगु दु ।

महाद्यः ननिइ च्वंगु आगंछेँ गुथिया गुथियार राजोपाध्यायतय्सं छगू पत्रकार सम्मेलन यासें ऐतिहासिक, सांस्कृतिक, धार्मिक महत्वं जाःगु आगंछेँया संरक्षण यायेमाःगु खँय् सरोकारवालातय्सं बः बिउगु दु । आगंछेँ संरक्षणया निंतिं राज्ययाके स्पष्ट नीति मदुगुलिं नं अस्तित्व संकटय् लाःगु इमिसं धाःगु दु ।

तसकं जीर्ण अवस्थाय् थ्यनेधुंकूगु महाद्यःननिया आगंछेँ पिने हे पत्रकार सम्मेलनय् नवासें गुथियार रविन्द्रधर शर्मां आगंछेँया संरक्षण जुइमफुगुलिं थ्वलिसे सम्बन्धित ऐतिहासिक व सांस्कृतिक गतिविधि तकं प्रभावित जुइगु स्थिति थ्यंगु धयादिल । आगंछेँ तत्काल जिर्णोद्वार यायेमाःगु अवस्थाय् थ्यने धुंकूगु तर जिर्णोद्वारया ज्या न्ह्याकेत आपालं प्रक्रियागत रुपं हे समस्या दुगु वय्कलं धयादिल ।

वय्कलं धयादिल, ‘आगंछेँ जिर्ण अवस्थाय् थ्यंगुलिं पूर्णचण्डि, कृष्ण द्यःयाथाय् यायेमाःगु नित्यपुजालिसें कात्ति प्याखंया नृसिंह अवतारया तान्त्रिक पुजा तकं प्रभावित जूगु दु ।’

गुथिया मेम्ह गुथियार प्रतापधर शर्मां आगंछेँय् कृष्ण मन्दिर, पूर्णचण्डि द्यःलिसे सम्बन्धित तान्त्रिक पुजा जुइगु नापं नृसिंह अवतार सम्बन्धी नं पुजा जुइगु आगंछेँयात ल्यंके मफुत धाःसा कात्ति प्याखंया नृसिंह अवतार बन्द जुइगु स्थिति तक वइ धयादिल । आगंछेँय् तान्त्रिक विधिं पुजा यायेगु नापं बलि तकं बीमाः ।

आगंछेँ संरक्षणया निंतिं लालपुर्जा दयेकेत स्वयागु इलय् ३५ न्हुया सार्वजनिक सुचं पिहां वःगु तर लालपुर्जा दयेकेगु ज्या धाःसा जुइ मफुगु पत्रकार सम्मेलनय् जानकारी बिउगु दु । आगंछेँया जःखः च्वंपिंसं आगंछेँया जग्गायात सार्वजनिक चुक धकाः न्ह्यथनाः थःपिनिगु छेँ दनेगु इलय् नक्सा पास याःगु व उकिया बारे थःपिंत छुं कथंया नं जानकारी मवःगु आगंछेँया गुथ्याःतय् धापू दु ।

आगंछेँया संधियारतय्सं अनियमित तरिकां आगंछेँया जग्गाय् झ्याः, लुखा तयेगु नापं न्हूगु छेँया टप तकं पिकोगु ज्या यातं नं स्थानीय निकायं छुं हे चिउताः मक्यंगु गुथियारतय्सं धाःगु दु । थ्व सम्बन्धय् १९ वडा ज्याकूयात जानकारी बियागु इलय् सार्वजनिक चुक जूगुलिं जानकारी बीम्वाःगु धकाः अनियमित रुपं जुयाच्वंगु निर्माण पनेत छुं हे चिउताः मक्यंगु गुथियारतय् दावी दु ।

उखे महानगरपालिकाय् तकं उजुरी तयागु खःसां लालपुर्जा मदुुलिं उजुरी हे खारेज याना बिउगु गुथियारतय्सं धाःगु दु ।कात्ति प्याखं गुरु खलःलिसें नृसिंह अवतार, कृष्ण मन्दिरया नित्य पुजा याइपिं पुजारी महाद्यः ननिया हे राजोपाध्याय खःसा पूर्णचण्डिया पुजारी राजोपाध्यायतय् नं उगु आगंछेँ मंकाः आगंछेँ खः । २०७२ सालया तःभुखाचं जिर्ण जूगु आगंछेँ थौंकन्हय् नितँजाः जक ल्याः दनिसा ल्यं दुगु भाग नं तसकं जिर्ण अवस्थाय् थ्यनेधुंकूगु दु ।