प्रदेश २ या संसदय् भद्रगोल

येँ (नेपालभाषा टाइम्स)÷देशय् संघीय व्यवस्था ला वल, तर थुकियात माःगु व्यवस्थापन याये मफुगु कारणं थ्व गुलि अस्तव्यस्त जुइधुंकल धइगु खँ प्रदेश २ या अवस्थां छर्लङ्ग क्यनी ।
सरकारं याकूगु विकास निर्माण सम्बन्धी ज्याया भुक्तानी मयाः धकाः अन सत्तापक्षया हे सांसदतय्सं संसद चले मयाकुसे तयातःगु हे दत्या दयेधुंकल । अन शुरु जूगु संसदया निक्वःगु अधिवेशन दथुइ हे अवरुद्ध जुयाः आः तक समापन तकं मजूनि । मेमेगु प्रदेशय् निक्वःगु अधिवेशन समापन जुयाः नं स्वक्वःगु अधिवेशन शुरु जुइधुंकल, तर प्रदेश २ लय् धाःसा आः तक निक्वःगु अधिवेशन तकं समापन मजूनि ।

सरकारं ठेकेदारतय्त बीमाःगु ध्यबा मबिउ धकाः सांसदतय्सं संसद अवरुद्ध याःगु खः । तर ठेकेदारयात ध्यबा भुक्तानी यायेत आवश्यक कानून आः तक मदुनि धासें कर्मचारीतय्सं चेक च्वया मबिउ । थुकिं यानाः सरकारयाके ध्यबा दुसां नं खर्च याये फयाच्वंगु मदुनि । कानून दयेकेगु लागिं संसद च्वने माःगु आवश्यक जुइ । तर सांसदतय्सं धाःसा ध्यबा मवःतले संसद चले याके बी मखु धकाः अवरुद्ध यानाच्वंगु दनि । अन संसद अवरुद्ध जुयाच्वंगु हे स्वला दयेधुंकल ।

कानून लिपा दयेके, आःयात न्ह्यागु व्यवस्था यानाः जूसां ध्यबा भुक्तानी निं याना बिउ धकाः सरकारं इनाप याःसां कर्मचारीतय्सं धाःसा उकी वास्ता मयाःगु खँ मुख्यमन्त्रीं धाःगु दु । थःपिंसं धाःगु खँ मन्यं धकाः कर्मचारीयात कारवाही याये धाःसां थःहे अज्याःगु अधिकार मदुगु खँ वय्कलं धायेगु यानाच्वंगु दु ।

२ नम्बर प्रदेशय् समाजवादी पार्टी व राजपाया मंकाः सरकार चले जुयाच्वंगु दु । थ्वहे विवादं यानाः सरकार निकम्मा जुल धासें राजपा पक्षया छम्ह मन्त्रीं छुं न्हि न्ह्यः राजीनामा समेत बिउगु खः ।

सम्बन्धित बुखँ

LEAVE YOUR COMMENTS