थौं हरिसिद्धिइ भवानी त्रिशक्ति देवीया प्याखं

यल– थनया हरिसिद्धिइ भवानी त्रिशक्ति देवीया प्याखं थौं क्यनेज्या जुयाच्वंगु दु । ताःई न्ह्यवंनिसें न्ह्याना वयाच्वंगु हरिसिद्धिया थुगु प्याखं दछिया निक्वः क्यनेगु परम्परा दु । यल महानगरपालिका १८ स्थिति हरिसिद्धिइ सुथसिया ४ ताः इलंनिसें बहनीसिया ९ ताः ईतक प्याखं क्यनेगु ज्या जुइ ।
दछिया निक्वः क्यनीगु थुगु प्याखं थिंलाथ्व पुन्हि (यःमरि पुन्हि) व चिल्लाथ्व पुन्हि (होलपुन्हि)या दिं कुन्हु क्यनेगु याइ । आदि शंकराचार्य नेपाः वःगु इलय् बौद्धमार्गीलिसें शास्त्रार्थ यानाः बुके धुंकाः देगलय् नित्य पुजाया व्यवस्था मिले थुगु प्याखं क्यनेगु ज्या जुया वयाच्वंगु त्रिविविपाखें विद्यावारिधी यानादीम्ह धर्मगोविन्द महर्जनं कनादिल ।
न्हापा न्हापा थ्व प्याखं यःमरिपुन्हिनिसें होलिपुन्हि तक हे क्यनेगु चलन दुगु खःसा स्वइपिं मदया वनेवं आः वयाः दछिया निक्वः यःमरिपुन्हि व होलिपुन्हिया इलय् जक क्यनेगु याना वयाच्वंगु खः ।
स्कन्द पुराणय् धयातःकथं महाद्यः व पार्वती कैलाशया लुखा तिनाः पासा म्हिताच्वंगु इलय् चण्ड व प्रचण्ड नांया निम्ह दैत्यं दुहां वयेगु कुतः याःगु खः । नन्दी लगायत शिवगणं लुखाय् हे पने स्वःसां माने मजुइवं युद्ध यायेत तयार जुल । महाद्यवं पार्वतीयात शक्तिया रुपधारण याकाः निम्ह असुरयात स्यानाः लिहां वयेवं सिद्ध याःगुलिं सिद्धि नां बिउगु धापू दु ।
हरिसिद्धि भवानीया प्याखंया निंतिं गुथि संस्थानं ग्वाहालि याना वयाच्वंगु दुसा प्याखं क्वचायेकाः पंचबलि बीमाःगु व्यवस्था दु ।