संविधान दिवस : न दिपावली, न हाकुगु न्हि

येँ – संघीय समाजवादी पार्टीं थ्वहे वइगु असोज ३ गते न्यायेकीगु संविधान दिवसयात बहिष्कार नं मयायेगु व वकुन्हु दीपावली नं मयायेगु निर्णय याःगु दु । पार्टीया महासचिव गंगानारायण श्रेष्ठं ‘नेपालभाषा टाइम्स’ यात कनादी कथं असोज ३ गते पार्टीं न्हय्गुलिं प्रदेशया प्रमुख थासय् ‘संविधान संशोधनया आवश्यकता व औचित्य’ धइगु विषयय् अन्तक्र्रिया यायेगु ज्याझ्वः दयेकूगु दु ।

सरकारं संविधान दिवस हनेगु निंतिं पञ्चायती शैलीं थज्याःगु हे वसः पुना वयेमाः, राष्ट्रिय गान हायेके हे माः धकाः फरमान जारी याःगु खँ नं थःपिंत स्वीकार्य मजू लिसें उकथं हे संविधान च्याके हे माः व थ्व संविधानयात माने याये मखु धइगु मानसिकता नं पार्टीया मदु धासें वय्कलं थज्याःगु हे खँयात स्पष्ट यायेगु लागिं पार्टीपाखें अन्तक्र्रिया यायेत्यनागु जानकारी बियादिल ।

वय्कलं संविधान अपूर्ण जूगु व उकी दुगु त्रुटियात भिंकेमाःगु खँ कनादिसें उकिया निंतिं थःगु पार्टीं संविधान संशोधन यायेमाःगु माग याना वयाच्वनागु खँ नं कनादिल ।

मेखे संघीय समाजवादीया हे नेतृत्वय् दुगु २ नम्बर प्रदेशया सरकारं धाःसा थीथी ज्याझ्वः यासें संविधान दिवस हनेगु निर्णय याःगु दु । तर उगु हे सरकारय् सहभागी जुयाच्वंगु मेगु दल राष्ट्रिय जनता पार्टीं धाःसा संविधान दिवसयात २ नम्बर प्रदेश लिसें देय्न्यंकं हे हाकुगु न्हि कथं हनेगु निर्णय यानातःगु दु ।