मदनकृष्णया मिखां ख्वबि हायांच्वन….

येँ -वंगु न्यागू दश न्ह्यवंनिसें संसारयात न्हीका वया च्वनादीम्ह हास्य कलाकार मदन–कृष्ण श्रेष्ठ म्हीग तसकं ख्वयादिल । ताउत हे ख्वयादिल । वय्कलं थनिं ४५ दँ न्ह्यः छगू क्रान्ति हे याये थें इहिपा यानादीम्ह जहान मय्जु यशोदा श्रेष्ठ सुवेदी म्हीग बहनी १०.४५ बजे मंत । थनया पशुपतिइ म्हिगः वय्कःया अन्त्येष्टि । अन्त्येष्टिजःछि हे श्रेष्ठया मिखां ख्वबि हायाच्वन । हायांच्वन । पशुपतिइ नं आपालं मनूतय् भीड हे जूगु खः ।

मय्जु यशोदा तसकं सरे जुइयःगु क्यान्सर ल्वचं ग्रस्त जुया च्वनादीम्ह खः । थ्व झ्वलय् वय्कःयात ९७ क्वः केमो बीधुंकूगु दुसा खुक्वः तक अपरेशन यानाः क्यान्सरं ग्रस्त तपुगु आतापुति, स्येँ, कथु आदि थेंज्याःगु अंग ध्यनेधुंकूगु दु । लिपांगुखुसी वय्कःया क्यान्सर दुगःक्वँचय् सरे जुल गुकिं यानाः वय्कः दने हे मफुत ।

उपचारया झ्वलय् केमोया न्हून्हूगु विधि प्रयोग यायां दकलय् लिपा थःगु म्हया हि लिकयाः उकी इन्जेक्सन बीगु व लिपा वहे हि हानं म्हय् दुछ्वयेगु बुस्टर धाःगु प्रविधिं उपचार याःगु खः । थ्व उपचार मेडीसिटी अस्पतालय् याःगु खःसा वयां लिपा हरिसिद्धिया क्यान्सर अस्पतालय् वासः याकातःगु इलय् वय्कः मंत । मदुगु इलय् वय्कःया काय यमन व म्ह्याय सराना नापं दीगु खः । मांयात स्वयाः सराना म्हिगः हे अमेरिका लिहां वनेमाःम्ह खः ।

ख्यालिजुजु कथं सम्मानित मदनकृष्ण श्रेष्ठ थः हे नं पार्किन्सन ल्वचं ग्रस्त जुयादी । थ्व ल्वय्लिसे ल्वायेत वय्कःया छ्यनय् चिप्स जडान यानातःगु दुसा उकियात सञ्चालन यायेत छाती दुने ब्याट्री फिट यानातःगु दु गुकियात बाःछी छक्वः रिचार्ज यायेमाः ।

सम्बन्धित बुखँ

LEAVE YOUR COMMENTS