खँ हे क्वमचाःनि प्रहरीयात सिरपाः !

येँ- संखुवासभाय् छगू हे परिवारया खुम्ह मनूयात स्यानातःगु घटनाय् हानं न्हूगु ट्स्टि वःगुया नापनापं प्रहरीया ज्याखँयात कयाः न्ह्यसःचिं नं पिहां वःगु दु ।

छवाः न्ह्यः संखुवासभाया मादी धाःगु थासय् छगू परिवारया खुम्ह मनू स्याःगु घटनाय् प्रहरीं सीपिनि हे थः लाःम्ह २६ दँया लोकबहादुर कार्कीयात ज्वंगु खः । लिसें थ्व हत्याया ज्या कार्की याकःचां जक याःगु खः धासें वयागु विरुद्ध मुद्दा तयेगु तयारी समेत न्ह्याकूगु खः । तर मुद्दाया तयारी जुयाच्वँच्वं हे थ्व घटनाय् ल्हाः दुपिं धकाः हानं मेपिं प्यम्हेसित ज्वंगु दु । लिसें थ्व घटनाय् मू ल्हाः दुम्ह अभियुक्त मेम्ह हे खः धकाः नं प्रहरीं खुलासा याःगु दु । आः प्रहरीं लिपा पत्ता लगे जूपिं प्यम्हेसिया विरुद्ध नं मुद्दा न्ह्याकेगु तयारी यायेधुंकूगु दु ।

थुकथं सिधयेधुंकल धकाः त्वःतेधुंकूगु घटनाय् हानं न्हून्हूगु खँत लुया वःगुलिं थुकी प्रहरीपाखें गज्याःगु अनुसन्धान याःगु जुयाच्वन ले धकाः नं न्ह्यसः पिहां वःगु दु । थ्व घटनाय् मू दोषी लोकबहादुर कार्की हे खः धकाः ‘पत्ता लगे याःपिं’ प्रहरी अधिकारीतय्त प्रहरी हेडक्वाटरपाखें सिरपाः समेत बीधुंकूगु दु ।

ज्या याःपिं प्रहरीयात सिरपाः समेत बीधुंकूगु अवस्थाय् घटना सम्बन्धी न्हून्हूगु खँ पिहां वःगुलिं सिरपाः बीगु ज्या भचा मत्यःनिवं याःगु जुयाच्वन धइगु पुष्टि जूगु खँ धाःगु दु । लिसें थुकी प्रहरीयात सिरपाः बिउसां घटनाय् धाथें दोषी उपिं हे खः लाकि मखु धइगु खँया फैसला अझं वये ल्यं दनि । थुकी अदालतय् वहस जुइ तिनि । प्रमाण गाः मगाः स्वइ तिनि ।

अदालतं फैसला यायेधुंकाः तिनि थुकिया अन्तिम टुंगो जुइ । कन्हय् अदालतय् वनीबलय् आः प्रहरीं धाःगु स्वयां फरक फैसला नं वयेफु । उकिं आः हे हथासंसिरपाः बिउगु गलत जूगु बिचाः प्वंकाहःगु दु ।