ब्राजिल नंं पिने, थुगुसीया विश्वकप युरोपय् लाइगु पक्का

एजेन्सी – बेल्जियमया स्वर्णिम पुस्ताया न्ह्यःने अभागी जुइवं न्याक्वः तकया विश्वविजेता ब्राजिल विश्वकपं पिने लाःगु दु । बेल्जियम विरुद्ध नकतिनि क्वचाःगु कासाय् ब्राजिलं कासाया १३ मिनेटय् हे अभागी जुसे आत्मघाती गोल नयेमाःगु खः । थ्व धुंकाः नं कासाय् पुनरागमनया निंतिं तःगू हे कुतः याःसां बलयात पोस्टय् दुछ्वये मफुत । अःखबतं बेल्जियमं कासाया ३१ औं मिनेटय् थप छगू गोल यानाबिल ।

१३ औं मिनेटय् कर्नर बलयात क्लियर यायेत स्वःबलय् फर्नान्डिन्होया ब्वहलय् लानाः बल ब्राजिलया पोस्टय् दुहांगु खः । ३१ औं मिनेटय् काउन्टर एट्याकया झ्वलय् रोमेलु लुकाकुया पासय् डि ब्रएनां डिबक्सया लाइनं थ्वाःगु बलय् तप्यंक पोस्टय् दुहां वंगु खः ।

थ्व धुंकाः नं न्हापांगु हाफ व लिपांगु हाफय् ब्राजिलं तसकं मेहनत यासें कासाय् लिहां वयेत स्वःगु खः । कासाया ७६ औं मिनेटय् बल्ल सफलता चूलात रेनाटो अगस्टों कासाया ७६ औं मिनेटय् गोल यासें ब्राजिलया आशा थनाबिउगु खः, तर थ्व लिबाक्क जूगु थ्व गोलं ब्राजिलयात कासा बराबरीइ हयेत मगात । थ्व धुंकाः नं ब्राजिलपाखें गोलया निंतिं तःगू हे रणनीति सहित आक्रमण यातं नं गोल यायेमफुत । कासाया अन्तिम मिनेटय् नेयमारयात वःगु छगू बांलाःगु बल नं बेल्जियमया गोलकिपरं पोस्ट च्वं छ्वयाबिल ।

अन्ततः ब्राजिल २ – १ गोलं पराजित जुसें क्वार्टरफाइनल चरणं हे लिहां वनेमाःगु दु ।

ब्राजिलया थ्व पराजय लिपा आः थुगुसीया विश्वकप युरोपय् वनीगु पक्का जूगु दु । थ्वयां न्ह्यव जूगु कासाय् फ्रान्सं दक्षिण अमेरिकी टिम उरुग्वेयात बुकूगु खः ।

आः मेगु क्वार्टरफाइनल कासा युरोपेली टिमत क्रोसिया विरुद्ध रुस व इंग्ल्यान्ड विरुद्ध स्वीडेनया दथुइ जुइ । ब्राजिल व उरुग्वेया पराजय लिपा दक्षिण अमेरिकाया चुनौति नं क्वचाःगु दु । आः बेल्जियमं सेमिफाइनल कासा फ्रान्स नाप म्हितीगु जुइ ।

नकतिनि क्वचाःगु क्वार्टरफाइनल कासाय् बांलाःगु कासा म्हितूसां बेल्जियमपाखें २ – ० गोलं बुइवं ब्राजिल विश्वकपं पिने लाःगु खः ।