एकीकरणया लँय् संघीय गठबन्धन

येँ – पहिचान पक्षधर जनजाति पार्टीतय् संघीय गठबन्धन दथुइ एकीकरण जुइगु सम्भावना अप्वया वंगु दु । देय्या न्हूगु राजनीतिक परिस्थितियात कयाः सहलह याना वयाच्वंगु पहिचान पक्षधर संघीय गठबन्धन नेतातय् दथुइ जूगु लिपांगु सहलह मुँज्या लिपा आः पहिचान पक्षधर पार्टीत एकीकरण यायेगु दिशाय् न्ह्याः वंगु खः ।नेपाः राष्ट्रिय पार्टीया संयोजनय् छुं दिं न्ह्यः जूगु सहलह लिपा च्वंगु मेगु मुँज्याय् सहभागि पहिचान पक्षधर जनजाति नेतातय्सं पहिचान सहितया संघीय व्यवस्था हयेगु खःसा सकलें जनजातित छप्पँ जुयाः न्ह्याः वनेगु बाहेकं मेगु विकल्प मदुगु निष्कर्ष पिकाःगु खः ।

संघीय गठबन्धनया लिपांगु मुँज्या च्वने न्ह्यः च्वंगु मुँज्यां निर्वाचन आयोगय् पार्टी एकीकरणया खँय् छु गज्याःगु व्यवस्था दु धइगु बारे न्यनेकने यायेगु ज्या जूगु खः । वयां लिपा आः सकलें पहिचान पक्षधरत अफ्रिकी नेशनल कंग्रेस (एएनसी)या मोडेलय् हे थःथःगु पार्टीया अस्तित्व कायम यानाः एकीकृत शक्ति निर्माण याना वनेमाःगु खँय् मुँज्यां निष्कर्ष पिकाःगु खः ।मुँज्याया निष्कर्षकथं यदि पार्टी एकीकरण यायेगु ज्या सफल जुल धाःसा नेपाःया पार्टीया चुनाव चिं ‘खड्ग’ हे एकीकृत पाटीया चिं जुइ फइगु आपालं सम्भावना दुगु नेपाः पार्टीया अध्यक्ष नापं सहलह मुँज्याया संयोजन यानादीम्ह डा. विजयप्रकाश सैंजूं कनादीगु दु । अथे खःसां मुँज्याय् लिम्बुवान पार्टीया खुकुरी चिं नं सम्भावना ब्वलनाच्वंगु दु । थौंकन्हय् प्रादेशिक संसदय् छम्ह जक सांसदया ल्याखं प्रदेश नं. १ य् संघीय लोकतान्त्रिक राष्ट्रिय मंच (लिम्बुवान)या उपाध्यक्ष विष्णुकुमारी तुम्बाहाम्फें प्रतिनिधित्व यानाच्वनादीगु दु ।

गठबन्धनया उगु मुँज्याय् नेपाःपार्टीपाखें नायः सैंजूलिसें केन्द्रीय दुजः नापं प्रदेश २ या इन्चार्ज मंगल मानन्धर, सेक्रेटारियत दुजः सुरेन्द्र नापित, लिम्बुवान पार्टीया नायः कुमार लिंगदेन मिराक, उपाध्यक्ष विश्वेन्द्र चेम्जोंग, खम्बुवान पार्टीया नायः नापं पुलांम्ह सभासद आर.के. खम्बु, केन्द्रीय दुजः कृष्णकुमार राई, थरुहटया नेता नापं फोरम लोकतान्त्रिकया नायः भानुराम थारु, ताम्सालिंग पार्टीया नायः सिंगमान तामांग उपाध्यक्ष रामबहादुर घिसिङ, राष्ट्रिय जनमुक्ति पार्टीया सहअध्यक्ष मानध्वज ब्लोन लगायतया उपस्थिति दुगु खः ।थ्व हे झ्वलय् वइगु फागुन २५ गते नेपाः राष्ट्रिय पार्टी थःपिनिगु स्थापना दिवस हनेत्यंगु दु । थीथी राजनीतिक पार्टीया नेतातय् ब्वनाः छगू विशेष ज्याझ्वः यासें स्थापना दिवस हनेगु पार्टीं जानकारी बिउगु दु ।