माधवनारायण मेलाया तयारी लिपांगु चरणय्

सक्व- माघ लछियंकं न्ह्याइगु थनया दकलय् तःजिगु व महत्वपूर्ण धार्मिक व सांस्कृतिक माधवनारायण मेलाया तयारी लिपांगु चरणय् थ्यंगु दु । मेलाया तयारी बारे जानकारी बीगु ल्याखं ग्वसाः ग्वःगु पत्रकार सम्मेलनय् मेलाया तयारी लिपांगु चरणय् थ्यंगु जानकारी बिउगु खः । श्री माधवनारायण स्वस्थानी व्रत तथा शालिनदी सुधार समितिया ग्वसालय् जूगु पत्रकार सम्मेलनय् मेलाया निंतिं छुं छुं ज्या जक याये ल्यं दुगु व मेलाया शुरु जुइगु ईतकया दुने ल्यं दुगु ज्या नं क्वचाइगु जानकारी बिउगु खः ।

पत्रकार सम्मेलनय् शंखरापुर नगरपालिका सक्वया नगर प्रमुख सुवर्ण श्रेष्ठं लछियंकं न्ह्याइगु मेलाय् वइपिं भक्तजन व श्रद्धालुतय् निंतिं मेलास्थलतक वये वने यायेत अःपुइमा धइगु ल्याखं मू लपुइ ग्राभेलिङ याये ल्यं दुगु व निन्हु स्वन्हुया दुने उगु ज्या क्वचाइगु जानकारी बियादिल ।

नगरप्रमुख श्रेष्ठं परापूर्वकालंनिसें न्ह्यना वयाच्वंगु सक्व देय्या धार्मिक व सांस्कृतिक महत्वं जाःगु मेलाय् वइपिं व्रत च्वनेत वइपिं, मेलाय् वइपिं श्रद्धालु भक्तजन व पर्यटकतय्त सुविधाया निंतिं व नगर विकासया निंतिं पर्यटन प्रवद्र्धनया ज्याझ्वः न्ह्याकेत्यनागु नं जानकारी बियादिल । समितिया नायः गोविन्दबहादुर श्रेष्ठं थुगुसी मेलाय् वइपिं पर्यटकतय्त बासं च्वनेगु नं व्यवस्था यानागु जानकारी बियादिसें करिब न्यय्म्ह पर्यटकयात च्वनेगु व्यवस्था सहितया सेवा बीगु ग्वसाः दुगु कनादिल ।