ख्वाउँ अप्वल, सतर्क जुयादिसँ !

येँ (नेपालभाषा टाइम्स)- स्वास्थ्य तथा जनसंख्या मन्त्रालयं स्वनिगः लिसें देय्न्यंकं ख्वाउँगु अप्वःगु धासें सतर्क जुइत इनाप याःगु दु । मन्त्रालयया प्रवक्ता डा. सञ्जयकुमार ठाकुरं ख्वाउँगु इलय् ल्वय्या प्रकोप अप्वये फइगु जूगुलिं सतर्क जुइत इनाप यानादीगु खः ।

ख्वाउँगु अप्वःगुलिं ज्याथ –जिथिपिं, तःल्वय् दुपिं, मस्त व प्वाथय् दुपिं मिसत विशेष सावधान जुइमाःगु खँ धाःगु दु । म्हिगः सुथय् येँया तापक्रम ७.६ डिग्री रेकर्ड जुइवं मन्त्रालयं सतर्क जुइत इनाप याःगु खः ।

ख्वाउँपाखें बचे जुइत लुमुगु वसः फीत, छ्यं व छातियात ख्वाउँपाखें बचे यायेत, चान्हय् सिलः व कम्बल थेंज्याःगु लुमुगु फांगां फायेत नं मन्त्रालयं इनाप याःगु दु । ख्वाउँ अप्वयाः तराईया गुलिखे जिल्लाय् शीतलहर नापं शुरु जूगु दुसा अन विशेष सतर्क जुइत नं मन्त्रालयं इनाप याःगु दु ।

उकथं हे मन्त्रालयं ख्वाउँगु इलय् छेँनं पिने खुला थासय् यक्व मच्वनेत, क्वाःगु नसा नयेत, क्वाःगु लः त्वनेत नं इनाप याःगु दुसा हिटर छ्यलेबलय्, मि कुइबलय्, गिजर छ्यलेबलय् क्वथाय् बांलाक फय् दुहां पिहां जुइगु व्यवस्था यायेत नं धाःगु दु ।

थ्वहे झ्वलय् ख्वाउँगु कारणं तराई लागाया जनजीवन प्रभावित जूगु दु । वंगु प्यन्हु न्यान्हु न्ह्यवंनिसें शीतलहर, ख्वाउँगु फय् व ख्वातुगु खसुं जनजीवन लिसें पशुपक्षी व बालीनाली नापं प्रभावित जूगु दु । लिसें ख्वाउँया कारणं तराई लागाय् लुमुगु वसःया ब्यापार नं अप्वःगु दु ।

सम्बन्धित बुखँ

LEAVE YOUR COMMENTS