ने. सं. ११४६ अनलाथ्व चतुर्दशी -

पार्टी विवादं सरकारय् पंगः

मन्त्रिमण्डल हिलाबुला यायेत पनाच्वन

येँ – सत्तारुढ दल नेपाल कम्युनिष्ट पार्टीया आन्तरिक कार्यविभाजन सिमधयाः सरकारं याये त्यंगु मन्त्रिपरिषद्य् मन्त्री हिलाबुलाया ज्या समेत प्रभावित जूगु दु ।पार्टीया आन्तरिक राजधानीइ पद व जिम्मेवारी विभाजनया ज्या सिधयेवं मन्त्रिमण्डल हिलाबुला यायेगु ग्वसाः यानाच्वंगु खःसा पार्टीया ज्या हे क्वमचाःगु कारणं थ्व ज्या नं लिज्यां वनाच्वंगु खँ सूत्रं धाःगु दु ।

आः जुइगु मन्त्रिमण्डल हिलाबुलाय् सरकारं ज्याया आधारय् छुं मन्त्रीतय्त बिदा बीगु व छुं मन्त्रीतय्त मन्त्रालय हिलेगु तयारी यानाच्वंगु दु । सरकारं पिने लात कि न्ह्याबलें विरोध याना–च्वनीम्ह भीम रावलयात सरकारय् हयेगु तयारी दुसां वय्कःयात यःगु मन्त्रालय मबीगु खँ दुगुलिं रावल थुकी दुथ्याइगु निश्चित मदयाच्वंगु खँ सूत्रं धाःगु दु ।

अप्वः न्ववानाः विवादय् वयाच्वंम्ह सञ्चार मन्त्री गोकुल बास्कोटाया मन्त्रालय हिलीगु सम्भावना दुसा अनावश्यक अडानं यानाः मलेशियाय् नेपाःमि श्रमिक रोके यानातःम्ह श्रम मन्त्री गोकर्ण बिष्टयात बिदा बीगु सम्भावना दुगु खँ नं सूत्रं धाःगु दु । प्रभावशाली नेतात ईश्वर पोखरेल, रामबहादुर थापापिंसं कयातःगु मन्त्रालय धाःसा थीगु सम्भावना मदु ।

प्रम केपी ओलीया यःम्ह महेश बस्नेतयात हानं मन्त्री दयेकीगु चर्चा दुसा थुगुसी स्वनिगःया नेवाःपाखें कृष्णगोपाल श्रेष्ठया सम्भावना नं अप्वयाच्वंगु खँ धाःगु दु । थुगुसी सरकारय् यंकीगु जूगुलिं वय्कःयात पार्टीइ खास हे जिम्मेवारी मबिउगु सूत्रया दावी दु ।

एमाले व माओवादी पार्टी एकीकरण जूबलय् केपी ओली व पुष्पकमल दाहालं निदँत्या–निदँत्या प्रधानमन्त्री जुयाः चले यायेगु सहमति जूगु खःसां आः थुकियात संशोधन यानाः ओली स्वदँ व दाहाल निदँ प्रम जुइगु कथंया सहमति जुइ फइगु खँ नं सूत्रं धाःगु दु । छुं ई न्ह्यः दाहालं थःत प्रम पद वा पार्टी सभापति माल धकाः दावी यानादीगु खः ।

स्कूल विवाद यथावत ः
मन्त्रिमण्डल न्हूधाः यायेगु ज्याय् पंगः जुयाच्वंगु मू विषय पार्टीया स्कूल विभाग सुनां कायेगु धइगु जुयाच्वंगु खँ नं सूत्रं धाःगु दु । पूर्व एमाले नेता इश्वर पोखरेल व पूर्व माओवादी नेता नारायण श्रेष्ठं स्कूल विभाग त्वःते मखु धकाः अडान कयाच्वंगु कारणं पार्टीया जिम्मेवारी बाँडफाँडय् समस्या जुयाच्वंगु खँ धाःगु दु ।

थुकिया बारे चर्चा यायेत प्रम ओलीं विहीवाः बहनी पूर्व एमाले नेतातय्त जक सःताः वालुवाटारय् सहलह समेत यानादीगु खः । ओलीं थ्व विभाग आः पार्टीया वरिष्ठ नेता झलनाथ खनालयात बीगु धकाः प्रस्ताव यानादीगु खः ।