ने. सं. ११४४ कौलाथ्व पारू - नःलास्वनेगु

‘इन्डो–प्यासिफिक’ खःसां स्वीकार

येँ -अमेरिका व नेपाः दथुइ जूगु मिलिनियम च्यालेन्ज कर्पोरेशन (एमसीसी) सम्झौता इन्डो प्यासिफिक रणनीतिया अंग खः धकाः अमेरिकां हे स्पष्ट याःसां नेपाः सरकारं धाःसा उकियात न्ह्याथे यानाः नं सदनं पारित याकेत स्वयाच्वंगु खँ सीदुगु दु ।पार्टीया म्हिगः च्वंगु सचिवालय बैठकं एमसीसीयात न्ह्यागु हालतय् नं पारित यायेगु निर्णय याःगु खः । म्हिगः प्रधानमन्त्री निवास बालुवाटारय् च्वंगु बैठकय् प्रधानमन्त्री केपी शर्मा ओलीं एमसीसी नेपाःया हितय् जूगु धासें उकियात पारित यायेगु निर्देशन बीवं मेम्ह अध्यक्ष पुष्पकमल दाहालं नं उकियात अनुमोदन यानादीगु खः ।

निम्ह अध्यक्षया अडानया कारणं संसदीय दलया दुजःपिंत आः ह्वीप जारी यानाः जूसां नं उकियात पारित याकेगु तयारी जुयाच्वंगु खँ सूत्रं धाःगु दु । छुं न्हिं न्ह्यः च्वंगु स्थायी कमिटीया बैठकं एमसीसी अमेरिकाया इन्डो प्यासिफिक रणनीतिया अंग खः मखु धइगु पुष्टि यायेगु जिम्मा सचिवालययात बिउगु खः । इन्डो प्यासिफिक रणनीतिया अंग खःसा उकियात स्वीकार मयायेगु निर्णय नं बैठकं याःगु खः । तर आः वयाः अमेरिकां थ्व ग्वाहालि इन्डो प्यासिफिक रणनीति अन्तर्गत हे खः धाःसां नं ओली व दाहालं उकियात लागू याकां त्वःतेगु कुतः याःगु खँ धाःगु दु ।

स्थायी कमिटीया छगू पुचः धाःसा इन्डो प्यासिफिक रणनीति अन्तर्गत खःसा थ्व ग्वाहालि याये मजिउ धइगु लाइनय् अझं दनिगु खँ सीदुगु दु । नेतातय् कुतःया वावजूद नं नेकपाय् थ्व विवाद अझं जारी हे दनिगु खँ सूत्रं धाःगु दु ।