ज्यापु समाज यलया वार्षिकोत्सव हन

यल(नेपालभाषा टाइम्स)÷ज्यापु समाज यलया ३१ क्वःगु वार्षिकोत्सव व ११ क्वःगु साधारसभा जुल । समाजया साधारणसभां न्हूगु नेतृत्व नं ल्यःगु दु ।

प्रधानमन्त्री केपी शर्मा ओलीं ज्याझ्वःया उलेज्या यानादिसें नेवाः संस्कृति देय्या हे सांस्कृतिक वैभव जूगु खँ न्ह्यथनादिसें नेवाः संस्कृतिया हे कारणं देय् सांस्कृतिक रुपं समृद्ध व वैभवशाली जूगु खः धयादिल ।

‘राजनीति व आर्थिक अवस्था स्यन धाःसा उकियात हाकनं दयेके फइ, तर संस्कृति, सभ्यता स्यन धाःसा उकियात हाकनं पुलांगु हे स्वरुपय् हये फइमुख’ प्रम ओलीं धयादिल, ‘झीत झी पुर्खां झीगु कला, संस्कृति, सभ्यता अमर जुइमा धकाः त्वःता थकूगु दु । उकियात न्हू पुस्तायात लःल्हाना वनेमाःगु झी सकसिगुं दायित्व खः ।

उगु इलय् प्रम ओलीं १०५ दँ दुम्ह मनमाया महर्जनं कला, संस्कृति संरक्षणय् मार्ग निर्देश यानाच्वंगुयात कयाः आभार प्वंकादीगु खः । लिसें वय्कलं थीथी ख्यलय् योगदान बियादीपिं नापं माध्यमिक शिक्षा परीक्षा (एसइइ) य् उत्कृष्ट ल्याः हयादीपिं विद्यार्थीयात हनेज्या नं यानादीगु खः ।

समाजया कार्यवाहक नायः ज्ञानेन्द्र महर्जनया सभापतित्वय् जूगु ज्याझ्वलय् बागमति प्रदेशसभा सदस्य मधुसुदन पौडेल, यल महानगरपालिकाया प्रमुख चिरिबाबु महर्जन, महालक्ष्मी नगरपालिकाया प्रमुख हरिगोविन्द श्रेष्ठ लगायतं भिंतुना न्वचु तयादीगु खः । समाजया साधारणसभां सन्तमान महर्जनया नेतृत्वय् न्हूगु ज्यासना पुचः नं ल्यःगु खः ।