‘बिआरआईलय् दुहां वनेत लिबाके मजिउ’

येँ – जःलाखःला देय् चीनं न्ह्यःने हयाच्वंगु बेल्ट एण्ड रोड इनिसियटिभ (बिआरआई)य् छुं नं कथंया सैन्य गन्ध मदु धासें नेपाल कम्युनिष्ट पार्टी (नेकपा)या अध्यक्ष व पुलांम्ह प्रधानमन्त्री पुष्पकमल दाहालं नेपाल थ्व परियोजनाय् तुरुन्त दुहां वनेमाःगु खँ धयादीगु दु ।

नेपाल बुद्धिजीवि संगठनं आइतवाः ग्वसाः ग्वःगु ‘बिआरआई संवाद’ ज्याझ्वलय् न्ववानादिसें वय्कलं धयादीगु दु, ‘चीनं न्ह्यःने हःगु बेल्ट एण्ड रोड इनिसियटिभ सामुहिक विकास व कनेक्टिभिटीलिसे सम्बन्धित परियोजना खः । थुकी छुं नं कथंया सैन्य गठबन्धनया गन्ध मदु । उकिं थ्व परियोजनाय् दुहां वनेत नेपालं लिबाकाच्वने मजिउ ।’

वय्कःया धापु दु, ‘बिआरआइ मानव जातिया समृद्धि व समाज विकासया परिकल्पनाया निंतिं हःगु परियोजना खः । उकिं थुकी सकसिनं मंकाः कुतः यायेमाः ।’चीनया थ्व परियोजना थःत महाशक्ति दयेकेगु निंतिं वःगु मखु धयागु दावी यासें वय्कलं थःम्हं न्हापा हे थ् व परियोजनाया बारे विस्तृत सहलह व गृहकार्य यानाः हस्ताक्षर यानागु खँ धयादीगु दु ।

वय्कःया कथं नेपालं रेल कनेक्टिभिटी, सडक पूर्वाधार व संचार विकासय् विशेष रुपं बिआरआई पाखें लाभ कायेफइ । चिनियाँ राष्ट्रपति सी जिनपिङं सन् २०१३ य् न्ह्यःने हःगु बिआरआई परियोजनाय् एसिया, युरोपे, दक्षिण अफ्रिका, मध्यपूर्व व अमेरिकाया यानाः १५२ गू देय्या पूर्वाधार विकास, बजार व लगानीया सहभागिता दइ ।

बिआरआईयात कयाः नेपाःया फुक्कं राजनीतिक दल दथुइ समान धारणा दुगु बांलाःगु संकेत जूगु धासें पुलांम्ह प्रधानमन्त्री दाहालं थःम्हं चीन व भारतया भ्रमणया इलय् निगुलिं देय्पाखें नेपालं सहकार्य यानाः लाभ कायेमाःगु व त्रिदेशीय साझेदारीया रणनीति दयेकेमाःगु खँय् बः बियागु नं न्ह्यथनादीगु दु ।

थ्व झ्वलय् वय्कलं नेपालं निगुलिं जःलाखःला देय् लिसे नेपाःया थःगु इतिहास, भूगोल व परम्परा अनुकल असंलग्न व स्वतन्त्र विदेश नीति नाला वयाच्वंगु खँ नं धयादिल ।

ज्याझ्वलय् न्ववानादिसें परराष्ट्र मन्त्री प्रदीपकुमार ज्ञवालीं नेपालं बिआरआईलय् हस्ताक्षर यायेधुंकूगु स्थितिइ नेपालं बिचाः यानाकथं लबः कायेमफुनिसां न्हूगु संविधान, संघीयता व देशय् आः दयाच्वंगु स्थिरताया कारणं आः फुक्कं राजनीतिक दलया सहमतिया आधारय् सरकारं ज्या न्ह्याकीगु खँ धयादिल ।

स्वंगुलिं तहया सरकारय् फुक्क कथंया कानुन तयार मजूनिगु व गाक्क जनशक्ति नं मदुगुलिं बिआरआई परियोजनां गति कायेमफुगु खँ धासें वय्कलं आःया इलय् निगुलिं जःलाखःला देय् भारत व चीनलिसेया स्वापू अझ क्वातुना वनाच्वंगु दावी नं यानादीगु दु । परराष्ट्र मन्त्री ज्ञवालीं सीमापर हिमालयन परियोजना अन्तर्गत अरनिको राजमार्ग, किमाथाङ नाका, स्याफ्रुबेसी करिडोर, ट्रान्समिशन लाइन विस्तार, हवाई सेवा सम्झौता आदि ज्याया तयारी जुयाच्वंगु खँ कनादिल ।

अथेहे नेपाली कांग्रेसया नेतृ सुजाता कोइरालां न्हापा कंग्रेसया सरकार दुगु इलय् नं बिआरआईया निंतिं सकारात्मक पहल जूगु खँ न्ह्यथँसें राष्ट्रिय हित व विकासयात ध्यानय् तयाः याइगु ज्याय् प्रतिपक्षया साथ दइगु खँ धयादिल । ज्याझ्वलय् संगठनया अध्यक्ष डा. दिनेश देवकोटां सरकारं न्ह्यःने हःगु समृद्धिया लक्ष्यय् बुद्धिजीवीपिनि पाखें ग्वाहालि दइगु खँ धासें थुगु गोष्ठीपाखे वःगु सुझाव सरकार व पार्टी नेतृत्वयात लःल्हायेगु खँ धयादिल ।