ने. सं. ११४४ ञलाथ्व नवमी -

‘अमेरिकां हे स्पष्टीकरण बीमाः’

येँ – वंगु छुं न्ह्यवंनिसें सत्तारुढ दल नेकपा दुने विवादया विषय जुया वयाच्वंगु मिलि–नियम च्यालेन्ज कर्पोरेशन (एमसीसी) या मुद्दायात अन्ततः स्थायी समितिया बैठकं क्वःछी हे मफुत । स्थायी समितिया बैठकं हे थुकिया छिनोफानो यायेमाः धकाः खँ जूगु खःसां बैठकं छुं निर्णय याये मफुसेंलि थुकिया बारे आः सचिवालय बैठकं हे निष्कर्ष पिकायेगु निर्णय म्हिगः च्वंगु स्थायी समितिया बैठकं याःगु दु ।

सचिवालय बैठकय् आः प्रधानमन्त्री लिसें पार्टीया अध्यक्ष केपी ओली सहितं हे जक थुकिया बारे निर्णय याये मालीगु खँ धाःगु दु । म्हिगः च्वंगु स्थायी समितिया बैठकय् एमसीसी वास्तवय् इण्डो–प्यासिफिक रणनीति अन्तर्गत लाःगु परियोजना खः लाकि मखु धकाः आः अमेरिकां हे स्पष्ट यायेमाःगु खँ पिहां वःगु खः । थुकिया बारे अमेरिकालिसे हे स्वापू तयाः न्यनेकने यायेगु जिम्मा नं आः प्रधानमन्त्री सहितया सचिवालययात बिउगु दु ।

एमसीसीया बारे नेपालय् ताः ई न्ह्यः हे चर्चा जूगु खःसां अमेरिकाया हे निम्ह सहायक मन्त्रीतय्सं थ्व परियोजना इण्डो प्यासिफिक रणनीतिया छगू अंग खः धकाः न्ववाःगुलिं नेपालय् थ्व विषय विवादय् वःगु खः । स्थायी समितिया म्हिगः च्वंगु बैठकं थ्वहे वइगु पुस २३ गतेनिसें पार्टीया केन्द्रीय कमिटीया बैठक च्वनेगु निर्णय नं याःगु दु । लिसें आः पार्टीया थःगु हे न्हूगु भवन दयेकेगु ज्या न्ह्याकेगु निर्णय नं बैठकं याःगु दु । अथे हे भारतं सार्वजनिक याःगु नक्सायात अस्वीकार यासें कालापानीइ तयातःपिं भारतीय सैनिक चीकेगु व नेपालं यानाच्वंगु थीथी ज्याय् भारतं थनाच्वंगु पंगः चीकेत इनाप यायेगु निर्णय नं याःगु दु ।

संसदया अनुमोदन छाय् ?

एमसीसीयात कयाः सत्तारुढ दल दुने हे विवाद ब्वलंगु जुयाः थुकियात संसदय् यंकाः अनुमोदन याकेगु ज्याय् विलम्ब जुइगु संकेत खने दया वःगु दु । अथे खःसां सरकारया प्रवक्ता लिसें सञ्चार मन्त्री गोकुल बास्कोटां धाःसा पार्टीया विवादं सरकारया ज्याय् पंगः वइ मखु धकाः स्पष्ट याःगु दु । विज्ञ सूत्रं धाः कथं एमसीसीया उगु सम्झौताय् उल्लेख जुयाच्वंगु छगू बुँदां यानाः थुकियात संसदया अनुमोदन आवश्यक जूगु खः । सम्झौताया छगू बुँदाय् ‘यदि नेपाःया कानूनया छुं नं बुँदालिसे थ्व सम्झौताया छुं बुँदा ल्वात धाःसा नेपालं सम्झौतायात मान्यता बी’ धकाः च्वयातःगु दु । नेपालय् छुं जुयाः कानून संशोधन जुयाः न्हूगु कानूनत बने हे जुया वल धाःसां नं सम्झौतायात छुं कथं लिच्वः मलायेमा धकाः विश्वस्त जुइत उकी थज्याःगु बुँदा तयातःगु खँ धाःगु दु ।