खाँदबारीइ धिमे व चचा प्याखं प्रशिक्षण
येँ(नेपालभाषा टाइम्स)÷नेवाः मिसा दबू खाँदबारीया ग्वसालय् जूगु धिमे बाजं, बासुरि व चचा प्याखं प्रशिक्षण क्वचाःगु दु । खाँदबारीया स्थानीय नेवाः समुदायया ल्याय्म्ह पुस्तायात लक्षित यानाः नीन्यान्हुया थीथी स्वंगू विधाय् प्रशिक्षण जूगु खः ।
संखुवासभाया खाँदबारी नगरपालिकाय् दबूया ग्वसालय् जूगु प्रशिक्षणय् ख्वीम्ह स्वयां अप्वः ल्याय्म्ह पुस्तायात उगु प्रशिक्षण बिउगु खः । स्थानीय नेवाः समुदायया ल्याय्म्ह पुस्तायात नेवाः कला, संस्कृतिया प्रवद्र्धनलिसें पुर्खां ल्यंका थकूगु पुलांगु सीप व कला न्हूगु पुस्तायात लःल्हायेगु उद्देश्यं जूगु धिमे बाजं, बासुरि व चचा प्याखं प्रशिक्षण झ्वलय् नेवाः भाय्या नं प्रशिक्षण बिउगु खः ।
शनिवाः छगू ज्याझ्वःया दथुइ उगु प्रशिक्षण क्वचायेकूगु खः । प्रशिक्षणय् १२ दँ निसें २५ दँ तकया ल्याय्म्ह पुस्ताया सहभागिता दुगु नेवाः मिसा दबू खाँदबारीया नायः रसिला शाक्यं जानकारी बियादीगु दु । ‘नेवाः संस्कृति व नेवाः समाजय् धिमे बाजं छगू महत्वपूर्ण हिस्सा जूगु व थुकियात न्हू पुस्ताया दथुइ प्रचलनय् हयेत, पुस्तान्तरण यायेत व नेवाः कला, संस्कृतिया प्रवद्र्धन यायेगु ल्याखं थःपिंसं निरन्तर कुतः याना च्वनागु व थुकियात हे तिबः व ग्वाहालि जुइकथं प्रशिक्षण न्ह्याकागु खः’, वय्कलं धयादीगु दु ।
नेवाः समुदायया सांस्कृतिक ज्याझ्वः, नखःचखः, जात्रापर्व आदिइ धिमे बाजंया उपस्थितिव भूमिका महत्वपूर्ण जुइगु व थुकिं नेवाः संस्कृतिया धरोहरयात जीवन्त याना तयेत ग्वाहालि जुइगुलिं नं प्रशिक्षण बियागु वय्कःया धापू दु ।
LEAVE YOUR COMMENTS