थौं खास्तिइ सापारु व रोपाइँ जात्रा

येँ(नेपालभाषा टाइम्स)- गाइजात्रा तथा रोपाइँ जात्रा मूल समारोह समितिया ग्वसालय् थौं भदौ ५ गते खास्तिइ सायाः व रोपाइँ जात्रा जुइगु जूगु दु । जात्रा सभ्य, भव्य व व्यस्थित रुपं सम्मन यायेत नापं सकसिनं थःथःगु थासं ग्वाहालि यायेत समितिं इनाप याःगु दु ।

समितिं छगू पत्रकार सम्मेलन यासें नेपाः छगू विविध भाषा, जाति, कला, धर्म, संस्कृतिया मंकाः क्यबया रुपय् दयाच्वंगु व विविधता दुनेया सांस्कृतिक परम्परा कायम याना तयेत सांस्कृतिक नगरीया रुपय् म्हसीया वयाच्वंगु खास्तिया सायाः व रोपाइँ जात्रा जीवन्त याना तयेगु ल्याखं थुगुुसी नं जात्रा ग्वसाः ग्वयेत्यनागु जानकारी बिउगु दु ।

समितिया संयोजक जनमङ्गल लामां जात्राय् घिन्तांघिसि, ख्यालिन्हिलि, सांस्कृतिक, घोनाइलिसें रोपाइँ जात्रा लगायतया ज्याझ्वःत जुइगु जानकारी बियादीगु दु । थुकथं हे जात्राय् लाखे, रोपार, बाउसे, ख्यालिन्हिलिं जाःगु झाँकी, मचा लाखे, सल प्याखं नं दुथ्याइगु जानकारी बिउगु दु ।