च्याम्पियन्स लिग – मेसीया पेनाल्टि असफल

एजेन्सी- च्याम्पियन्स लिग अन्तर्गत मंगलवाः चान्हय् जूगु अन्तिम १६ या कासाय् म्याचेस्टर सिटी व पिएसजी त्याःगु दु । अन्तिम १६ या न्हापांगु लेगय् प्रिमियर लिगया शीर्ष थासय् च्वनाच्वंगु म्याचेस्टर सिटीं पोर्चुगलया स्पोर्टिङ सिपीयात व फ्रेन्च लिग १ या शीर्ष थासय् च्वनाच्वंगु पेरिस सेन्ट जर्मेनं (पिएसजीं) स्पेनिस ला लिगाया शीर्ष थासय् च्वनाच्वंगु रियल म्याड्रिडयात बुकूगु खः ।

म्यानचेस्टर सिटीं स्पोर्टिङ सिपीयात ५–० गोलया तःधंगु अन्तर बुकूगु खः । सिटीया निंतिं बर्नाडो सिल्भां निगू गोल याःगु खःसा रियाद महरेज, फिल फोडेन व रहिम स्टर्लिङं छगू छगू गोल याःगु खः । स्र्पोटिङ सिपीयात घरेलु मैदानय् तःधंगु अन्तरं बुकाः सिटीं क्वाटरफाइनलय् थःगु थाय् लगभग निश्चित याःगु दु ।

मेगु कासाय् पिएसजीं रियल म्याड्रिडयात १–० गोलं बुकल । पिएसजीया निंतिं कासाया छगू जक गोल केलियन एमबाप्पें निगूगु हाफया इन्जुरीइ इलय् नेयमारया पासय् याःगु खः । थ्व कासाय् स्टार कासामि लियोनल मेसीं पेनाल्टी मिस याःगु खः । कासाया ६२ औं मिनेटय् मेसीं थ्वाःगु पेनाल्टीं गोलकिपर कोर्टुवां सेभ याःगु खः ।