‘वयेमते छ आशा क्यंका…’
नेवाः सुपरस्टारया दावेदार व नेपालभाषा स्टार म्यूजिक भिडियो अवार्डय् उत्कृष्ट मिजं मोडलय् टप १० य् ‘नोमिनेट’ लिसें नेपालभाषा संकिपा ख्यःया हिरो अले दकलय् अप्वः म्यूजिक भिडियो म्हितूम्ह नांजाःम्ह कलाकार रुपेन श्रेष्ठ थक्वाःमिया न्हूगु म्यूजिक भिडियो हाईलाइट्स नेपाल यूट्युब च्यानलय् अपलोड जूगु दु ।
उगु म्यूजिक भिडियोय् रुपेन श्रेष्ठ थक्वाःमिलिसे न्हूम्ह मोडल दिया श्रेष्ठं मू भूमिकाय् म्हितादीगु दु । हसना शाक्यया सलय् सुमन चित्रकारया च्वसाय् व सुमन कपालीया संगीत व संयोजनय् पिदंगु ‘वयेमते छ आशा क्यंका…’ बोलया म्येँया म्यूजिक भिडियोया निर्देशक लूजः सिंह खःसा क्यामेरा पर्सन व सम्पादक योवन शाक्य ‘१४के’ खः ।
मुक्कं लू किपूया २ वडा द्यःध्वाखा त्वाःया माःक्वाःचा गार्डेनय् सुटिङ्ग यानातःगु थुगु ‘वयेमते छ आशा क्यंका…’ म्येँया म्यूजिक भिडियोय् दिया श्रेष्ठ न्हूम्ह कलाकार जूसां बांलाक अभिनय यानातःगुलिं वय्कः छम्ह प्रतिभावान् कलाकार खः धायेछिं । थुगु म्येँया विषयय् कलाकार रुपेनं धयादी, ‘थुगु म्येँया म्युजिक भिडियो १० महिना न्ह्यः हे पिदनेमाःगु खः, तर आः नकतिनि जक पिदन ।
कारणवश फुक्क फिक्स जूसां नं सुटिङ्गया ज्या न्ह्याके जक मफयाच्वंगु खः । कलाकार रुपेनं न्हूम्ह मोडल दिया श्रेष्ठयात थुगु म्येँपाखें ‘ब्रेक’ बियागु खँ न्ह्यथसें धयादी, ‘दियां थुगु म्येँया सुटिङ्गया याये न्ह्यःतक बांलाक अभिनय याइमखु ला धइगु पीर जुयाच्वंगु खः, तर अथे मखसे दियां बांलाक हे अभिनय यानाः भिडियोया स्तरीयता थकायेगु ज्याय् ग्वाहालि याःगु दु ।
अय्सां दिया न्हूम्ह मोडल जूगुलिं छुं भचा धाःसा थाकुल । नांजाःम्ह म्यूजिक भिडियो निर्देशक लूजः सिंह व क्यामेरा पर्सनलिसें सम्पादक योवन शाक्य ‘१४के’ नापं ज्या याःगु दकलय् न्हापांगु थुगु म्यूजिक भिडियोया ‘मेकअप आर्टिष्ट’ सरीता बज्राचार्य खः ।
LEAVE YOUR COMMENTS