नेवाः संकिपा नखः न्ह्यात

येँ – यँयाःया सन्दर्भ लाकाः थनया जनबहालय् मछिन्द्र क्लबया ग्वसालय् नेवाः संकिपा नखः सुरु जूगु दु । म्हीग बहनी येँ मनपा २७ वडाया अध्यक्ष निलकाजी शाक्यं उकिया उलेज्या यानादीगु खः । उगु इलय् अन क्यनीगु थीथी नेवाः संकिपाया निर्माता व निर्देशकपिंत लसकुस यायेगु ज्या नं जूगु खः ।

थ्व संकिपा नखः थुगुसी प्यन्हु जक न्ह्याइ । यंलाथ्व दुतिया कुन्हु महाकवि सिद्धिदास बुन्हिया लसताय् नेपालभाषा शर्टफिल्म कासाय् दुथ्याःगु गुंगू शर्ट फिल्म नं क्यनीगु ग्वसाः दु । ग्वसाः खलकं धाः कथं स्वदँ न्ह्यः थःपिंसं यानागु शर्ट फिल्म धेंधेंबल्लाःया सिरपाः नं वकुन्हु लःल्हायेगु ज्याझ्वः दु ।