ने. सं. ११४३ तछलाथ्व दशमी -

सोनाली बेन्द्रेयात क्यान्सर

बलिउडया छगू इलय्या सुन्दर हिरोइन कथं नांजाःम्ह सोनाली बेन्द्रेयात क्यान्सर जूगु दु । सोनालीं हे थःगु इन्स्टाग्राम मार्फत थःत क्यान्सर जूगु खँ सार्वजनिक याःगु खः । सोनालीं इन्स्टाग्रामय् च्वःगु दु, ‘जितः हाइग्रेड क्यान्सर जुयाच्वंगु दु । धाथें जिं नं मसिउ थ्व क्यान्सर छु खः धयागु । म्ह भचा स्यानाच्वंगुलिं परीक्षण याकागु, तर सुनां नं बिचाः हे मयाः कथं लिच्वः पिहांवल । ’

सोनाली आः न्यूयोर्कय् वासः याकाच्वंगु दु । थ्व इलय् सकसिनं थःगु उसाँयया निंतिं कामना यानाच्वंगु धासें सोनालीं सकसितं सुभाय् बिउगु दु ।
सोनालीया कथं वयात जूगु क्यान्सर म्हया मेगु ब्वय् नं न्यना वनेधुंकूगु दु । वं इन्स्टाग्रामय् च्वःगु दु, ‘थ्व इलय् उपचार यायेगु बाहेक मेगु उपाय मदु । उकिं चिकित्सकतय् सल्हा कथं जिं न्यूयोर्कय् उपचार सुरु याये धुनागु दु । अले जिं सासः दतले थ्व ल्वय् लिसे ल्वायेगु जुइ ।’

सोनालीं थःगु पोस्टय् थःत हाइग्रेड मेटास्टिस्ट क्यान्सर जूगु खँ न्ह्यथनातःगु दु । थुकिं वयात छुकिया क्यान्सर जूगु धयागु सीमदु, तर हाइग्रेड मेटास्टिस्ट क्यान्सर धायेवं चिकित्सकीय भासं तच्वःगु व क्यान्सर सुरु जूथासं मेथाय् न्यना वनेधुंकूगु धयागु सीदुगु खँ धाःगु दु ।
थःगु सुन्दरताया निंतिं लोकंह्वाःम्ह हिरोइन सोनालीं बलिउडय् कल हो ना हो, सरफरोस, दिलजले, डुप्लिकेट थेंज्याःगु फिल्मय् म्हिताः लोकंह्वाःम्ह खः ।

बलिउडया मेम्ह छम्ह अभिनेता इरफान खान नं थौंकन्हय् अमेरिकाय् क्यान्सरया उपचार यानाच्वंगु दु ।