निन्हुयंकंया चिनिया चित्रकला ब्वज्या

येँ – नेपाल कला परिषद्, बबरमहलय् निन्हुयंकंया चिनिया चित्रकला ब्वज्या शुरु जूगु दु । नेपाः व चीन दथुइ सांस्कृतिक स्वापू च्वन्ह्याकेगुउद्देश्यं जूगु चिनिया चित्रकला ब्वज्याया उलेज्या राष्ट्रियसभाया अध्यक्ष गणेशप्रसाद तिमिल्सिनां यानादीगु खः ।

चित्रकला ब्वज्याया उलेज्या यासें राष्ट्रियसभाया अध्यक्ष तिमिल्सिनां उगु चित्रकला ब्वज्यापाखें चिनिया जनताया जनजीविका, चिनिया जनताया व चिनिया प्रकृतिया बारे अभिरुचि तइपिंसं आपालं जानकारी काये फइगु विश्वास प्वंकादिल ।

ज्याझ्वलय् प्रा. डा. कृष्णप्रसाद अधिकारीं चित्रकला ब्वज्यां नेपाः व चिनिया चित्रकलाया कालबिल यायेगु नापं चिनिया चित्रकला बारे अध्ययन यायेत नं सहयोगी जुइगु विश्वास प्वंकादिल ।

नेपाल ललितकला मंच, नेपाल ललितकला पत्रकार समाज (सोफाज) व चीनया थ्री ग्रजेज विश्वविद्यालयया मंकाः ग्वसालय् जूगु चित्रकला ब्वज्याय् विश्वविद्यालयया हे स्वम्ह प्राध्यापकपिं वेई मिंगुओ, झोउ चुआन्फो व सिचाङ शि पिङया किपा तयातःगु दु । ब्वज्याय् चिनिया जीवनशैली, प्रकृति व वातावरण सम्बन्धी स्वीपाः स्वयां अप्वः चित्रकला तयातःगु दु ।