ने. सं. ११४४ कौलाथ्व पारू - नःलास्वनेगु

प्रधानमन्त्रीया ट्विटर तकं ह्याक !

येँ – नेपालय् इलय् ब्यलय् सरकार व थीथी मन्त्रालयया वेब साइट ह्याक जुइगु घटना ला इलय् ब्यलय् जुया हे वयाच्वंगु जुल । आः वयाः धाःसा स्वयम् प्रधानमन्त्रीया ट्विटर तकं ह्याक जुइगु घटना समेत जूगु दु । म्हीग शुक्रवाः प्रधानमन्त्री केपी शर्मा ओलीया ट्विटरपाखें भारतया विपक्षी दलया नेता सोनिया गान्धीं बियादीगु छगू सम्बोधन समेत रिट्विट जुइवं प्रधानमन्त्री कार्यालय दुने तःधंगु हे खैलाबैला मच्चे जुल ।

खतुं उगु रिट्विटयात तुरुन्त हे भिंकेगु ज्या नं जुल तर प्रधानमन्त्रीया ट्विटरपाखें थ्व गय् यानाः रिट्विट जुल धइगु ब खँ धाःसा सुनां नं मसिउ । प्रमया प्रेस सल्लाहकार सूर्य थापां प्रमया ट्विटरपाखें ‘अन्यथा’ सामग्री रिट्विट जुल धासें उकी सुं नं भ्रमित जुयामदीत इनाप यानादीगु दु । लिसें वय्कलं थ्व गय् यानाः जुल धइगु बारे छानबिन जुयाच्वंगु खँ नं कनादीगु दु ।

प्रधानमन्त्रीया ट्विटर प्रम कार्यालय दुनें हे छगू पुचलं सञ्चालन याइगु खःसां थ्व धाथें सुनां सञ्चालन याइ धइगु खँ धाःसा गोप्य हे याना तइ । अथे खःसां लिपांगु छुं ई थुखेंनिसें प्रमया ट्विटर प्रम स्वयमं हे चले याना वयाच्वंगु खँ नं पिने न्यनेदु । छुं ई न्ह्यः जक प्रमयात एपेन्डिक्स जुयाः अस्पताल भर्ना याःबलय् वय्कलं अस्पतालया बेडं थःपिंसं हे ट्विट यासें थःगु स्वास्थ्य ठीक जुयाच्वंगु दु धकाः सन्देश बियादीगु खः । उगु ट्विट सुं सहयोगीं सञ्चालन याःगु मखुसें प्रम थम्हं हे चले यानादीगु खँ नं अबले सार्वजनिक जूगु खः ।

आः प्रम ओलीया ट्विटरं रिट्विट जूगु सन्देशय् सोनिया गान्धीं भारतय् विवादय् लानाच्वंगु नागरिकता विधेयक बारे न्ववासें मोदी सरकारया आलोचना व जनतायात संयम जुइत इनाप यानातःगु दु । अज्याःगु सामग्री नेपाःया प्रधानमन्त्रीपाखें रिट्विट जुल धासें भारतय् समेत उकियात कयाः समाचार दयेकेगु शुरु याना हःगु दु । लिसें नेपालय् नं सामाजिक सञ्जालय् उकियात कयाः चर्चा जुयाच्वंगु दु ।