भूमि मन्त्रीयात सचेत पौ बीगु

गुथि विधेयकयात कयाः नेवाःतय् तयारी

येँ – विवादा–स्पद गुथि विधेयकयात सरकारं हानं हयेगु तयारी शुरु यायेवं उकियात कयाः आः थःपिंसं छु गज्याःगु पलाः ल्ह्वने माली धइगु खँय् स्थानीय नेवाः समुदाय दथुइ नं सहलह व खँल्हाबल्हा शुरु जूगु दु । थ्वहे झ्वलय् सरकारं हयेत्यंगु न्हूगु विधेयकया बारे सम्बद्ध मन्त्रीयात हे नापलानाः खँल्हाबल्हा यायेगु व थःपिनि सरोकार क्यँसें सचेत पौ समेत बीगु खँय् नेवाः न्ह्यलुवातय् दथुइ खँ जूगु सीदुगु दु ।

गुथि विधेयक विरुद्ध एकीकृत आन्दोलनया म्हिगः च्वंगु मुँज्यां थुकिया बारे गम्भीर रुपं सहलह याःगु खः । सरकारं भूमि व्यवस्थापन यायेगु नामय् गुथिया जग्गा समेत थःगु यानाः कायेगु कथंया विधेयक पित हयेवं उकिया विरुद्ध स्थानीय नेवाःत सतकय् कुहां वःगु खः ।

वंगु असार ४ गते स्थानीय नेवाःत अभूतपूर्व रुपं सतकय् कुहां वयेवं असार १० गते सरकारं राष्ट्रिय सभाय् वनेधुंकूगु उगु विधेयक विधिवत् रुपं लित काःगु खः । न्याला तक सुम्क तयातःगु उगु विधेयकयात आः हानं न्ह्यःने यंकेगु तयारी सरकारं यायेवं सरोकारवाला नेवाः समुदायं थःपिनि जानकारी व सहमति मकासे उगु विधेयक पारित याये दइ मखु धासें सरकारया ध्यान सालेत सचेत पौ बीगु तयारी याःगु खः ।

सरकारपाखें नं भूमि व्यवस्थापन सम्बन्धी विधेयक न्ह्यःने यंकेबलय् गुथिलिसे स्वापू दुगु भूमिया सवालय् छु यायेगु धकाः सम्बन्धित सरोकारवाला समुदायलिसे हे वार्ता यायेगु धकाः निर्णय याःगु दु ।

सरकारया प्रवक्ता लिसें सञ्चार मन्त्री गोकुल बास्कोटा व भूमिसुधार मन्त्री पद्मा अर्यालं नं थुकिया बारे सरोकारवाला समुदायलिसे वार्ता यायेगु खँ धयादीगु खः । आन्दोलनया बैठकं आःयात भूमिसुधार मन्त्रीयात नापलानाः सरकारया ग्वसाः बारे न्यनेकने यायेगु व उकी थःपिनि माग स्पष्ट यायेगु खँ नं धाःगु दु ।

जनप्रतिनिधिलिसे अन्तक्र्रिया
गुथि विधेयक विरुद्ध एकीकृत आन्दोलनया म्हिगः च्वंगु मुँज्यां आः सरकारं हयेत्यंगु गुथि व भूमि सम्बन्धी थीथी विधेयकयात कयाः नेवाः समुदाय दथुइ अन्तक्र्रिया ज्याझ्वः यायेगु निर्णय नं याःगु दु ।

लिसें विवादय् लाःगु गुथि विधेयक बारे स्वनिगःया निर्वाचित नेवाः जनप्रतिनिधिलिसे नं खँल्हाबल्हा यायेगु क्वःछिउगु दु । भूमिसुधार मन्त्रीयात बीगु सचेत पौ प्रधानमन्त्री, प्रधानमन्त्रीया कार्यालय व राष्ट्रियसभा लिसें प्रतिनिधिसभाया सकलें सांसदतय्त नं लःल्हायेगु निर्णय याःगु दु ।

सम्बन्धित बुखँ

LEAVE YOUR COMMENTS