खबरदारी बाइक र्याली
येँ, यल, थिमि, ख्वप चाःहिलाः किपुली समापन
येँ – सरकारं गुथि विधेयक लित कायेधुंकूसां नं थुकियात नेवाःतय् अनुकुल जुइकथं संशोधन यायेत आनाकानी मयायेमा धकाः म्हिगः खबरदारी मोटरसाइकल र्याली पिहां वःगु दु । येँया न्हूसतकं शुरु जूगु उगु र्याली यल, थिमि, ख्वप जुयाः किपुली थ्यंकाः क्वचाःगु खः ।
र्यालीइ द्वलंद्वः मोटरसाइकल व स्कुटरं ब्वति काःगु खः ।लिसें दथु दथुइ आपालं गाडीत नं दुगु खः । र्यालीया आपालं स्कूटरत मिसापिंसं हे चले यानाः वःगु खःसा लिउने नं मिसाम्ह हे च्वना वःगु खः । गुलिं मस्त नापं ब्वनाः नं र्यालीइ सहभागी जूगु खः । र्यालीइ ब्वति काः वःपिंसं नेपाःया ध्वाँय् लिसें नेवाः स्वायत्त राज्यया ध्वाँय् नं ज्वना वःगु खः ।
लिसें ब्वति काः वःपिंसं गुथि विधेयक खारेज या, जनता सकलें दने माल धइगु नारा च्वया तःगु प्लेकार्ड नं ब्वया वःगु खः । थीथी लागा चाःहिलेगु झ्वलय् दथु दथुइ झासु लनेगु ज्या नं जूगु खः । यल, थिमि, ख्वप देय् चाःहिलाः अन्तिमय् किपुली थ्यंकाः किपू गेटया नापसं खेलकुद मैदानय् छगू सभा यासें र्याली समापन याःगु खः ।
समापन सभाय् नेवाः देय् दबूया नायः नरेश ताम्राकार लिसें ल्याय्म्हपिं आन्दोलनकारीत सुमन साय्मि, गणपतिलाल श्रेष्ठ व श्रीकृष्ण महर्जनं सम्बोधन यासें आन्दोलन जारी हे दुगु खँ कनादीगु खः । न्हूसतकय् र्याली शुरु जूबलय् नेवाः न्ह्यलुवापिं दुर्गालाल श्रेष्ठ, मल्ल के. सुन्दर, पवित्र वज्राचार्य आपालं न्ह्यलवापिं नं सहभागी जूगु खः ।
LEAVE YOUR COMMENTS