केन्द्रय् सिबें नं स्थानीय निकायय् वित्तीय अराजकता अप्वः

येँ – संघीय सरकारया तुलनाय् स्थानीय सरकार दुने वित्तीय अराजकता तसकं अप्वयावंगु खँ सीदुगु दु । महालेखा कार्यालयया कथं केन्द्रय् स्वयां नं स्थानीय निकायय् वित्तीय अराजकता अप्वः दुु । महालेखा परीक्षण कार्यालयं धाः कथं स्थानीय तहलय् भ्रमण भत्ता, तलब, अनुगमन, गाडी व सेवा सुविधाया नामय् यक्व ध्यबा दुरुपयोग जुयाच्वंगु दु ।

लेखा परीक्षण जुयाच्वंगु स्वनिगःया स्वंगू जिल्ला लिसें ३३ गू जिल्लाया रिपोर्ट वयेगु ज्या जुयाच्वंगु दु । थ्व रिपोर्टय् अप्वः यानाः तलब सुविधा, भत्ता, अनुमगन, सवारी साधन व भ्रमणय् अप्वः खर्च जुयाच्वंगु क्यना तःगु दु ।

महालेखा परीक्षणया कथं वंगु दँय् १८० अर्बया लेखा परीक्षण जूगु खःसा १४ अर्ब बेरुजु खनेदुगु खः । थ्व धइगु मुक्कं लेखा परीक्षण याःगु ध्यबाया ७.९ दशमलव बेरुजु खः । तर केन्द्रया ४७ खर्ब तका ध्यबाया लेखा परीक्षण याःगु इलय् मुक्कं ५.०४ प्रतिशत जक बेरुजु खनेदुगु खः ।