चेकय् नक्कली हस्ताक्षर यानाः लुट

येँ – छिं बैंकय् एसएमएस सेवा कायेगु त्वःफिका दियागु ला मदुला ? त्वःफिकादियागु दुसा याकनं हे थ्व सेवा कयादिसँ । छाय्धाःसां बैंकय् दुगु छिगु मौज्दात सुनां लिकया यंकल धाःसा न त छिं सिइकेफइ, न त बैंकं हे सिइके फइ । येँय् थज्याःगु हे छगू तःधंगु घटना सार्वजनिक जूगु दु । गुगु काचाक्क पत्या तकं याये थाकु ।

थःगु ध्यबा सुरक्षित जुइमाः, आवश्यकबलय् लिकाये फयेमा धकाः ढुक्क जुयाः बैंकय् तइ, तर बैंकया कर्मचारीतय् लापरवाही यानाः बैंकय् च्वंगु ध्यबा नं मेपिंसं याउँक लिकाना यंकी । बैंक सेवाय् हे न्ह्यसः दनी कथं छगू गिरोहं थथे हे यानाः मेम्ह मनूया खातां थ्यंमथ्यं २० लाख तका लिकायेत ताःलाःगु दु ।

छुं हे प्रविधी मछ्यसे चेकं हे थथे याउँक ध्यबा लिकाइगु जुल धाःसा बैंकयात गुकथं विश्वास यायेगु ? गम्भीर न्ह्यसः दंवःगु दु ।चिनियाँ ह्याकरतय्सं एटिएमया स्वीच ह्याक यानाः वंगु भदौलय् करोडौं तका ध्यबा खुयाकाःगु खः । कृषि विकास बैंक व पानस रेमिटया सफ्टवेयर ह्याक यानाः असोजय् ६५ लाख तका लिकाये धुंकूगु खः ।

न्यागू अर्ब लुटे यायेत वःपिं उमित प्रहरीया सक्रियतां तुरुन्त ज्वनेफत । उगु घटनाय् संलग्न चिनियाँ लिसें नेपालीत आः थुनाय् दु । प्रविधिया छ्यलाबुला अप्वया वंलिसें बंैकिङ प्रणालीइ हे न्ह्यसः दना वयाच्वंगु अवस्थाय् प्रविधी हे मछ्यसे खातावालया कीर्ते हस्ताक्षर यानाः वया हे नामं न्हूगु चेकबुक दयेकाः ध्यबा लिकाःगु घटना सार्वजनिक जूगु दु ।

उम्ह खातावालं एसएमएस सेवा कयातःगुलिं थःगु ध्यबा जक जोगे जूगु मखुसा गिरोहयात हे ज्वनेफुगु दु । थ्व घटना वंगु आइतवाः जूगु खःसां महानगरी प्रहरी परिसर येँ नं बुधवाः जक सार्वजनिक याःगु खः । थुगु घटनाय् संलग्न खुम्हेसित ज्वनाः उमिगु पाखें १८ लाख ५० हजार तका बरामद याःगु दुसा छुं ध्यबा उमिसं इना कायेधुंकूगु नं लुइकूगु दु ।

थुकथं जुल घटना
आइतवाः न्हिनय् २ बजे पाखे जनता बैंकया ग्वार्को शाखाय् गोपालमान राजवाहकया नामं चेकबुक तन धकाः न्हूगु चेकबुक दयेकेत निवेदन वल । बैंकया कर्मचारीं २ः३० बजे याउँक चेकबुक दयेकाबिल । उगुह े शाखापाखें ध्यबा लिकायेबलय् शंका जुइगुफुगुलिं गिरोहं न्हिनय् ३ः३० बजे बानेश्वरय् च्वंगु उगु बैंकया मेगु शाखाय् वनाः चेकपाखें ९लाख ९९ हजार तका ध्यबा लिकाल ।

न्हिनय् काउन्टर बन्द जूगुलिं सनिलय् निपाः चेकपाखें हाकनं न्यागू न्यागू लाख तका लिकात । थथे थःगु खातां ध्यबा लिकाःगु एसएमएस वःबलय् राजवाह धाःसा चकित जुल । सुयातं चेक नं बिउगु मदु, एटिएम कार्ड नं बिउगु मदु, गुकथं ध्यबा पिहां वल धकाः वय्कः चकित जुयाच्वन ।

ध्यबा लिकाःगु एसएमएस वयेवं राजवाहकं महानगरीय प्रहरी परिसरय् स्वापू तयादिल । तुरुन्त हे प्रहरी अलर्ट जुल । निगरानी सुरु जुल । फुक्कं बैंकतय्त सर्कुलर यानाः प्रहरी अज्याःपिं मनू वयेवं खबर यायेत धाल । राजवाहकया खाता न्यागू लाख ल्यं दनिगु सिउपिं थ्व गिरोह कन्हय् कुन्हु सोमवाः हाकनं स्वपाः चेक दयेकाः ध्यबा लिकायेत न्यूरोड शाखाय् वल ।

ध्यबा लिकावःपिंत न्यूरोडं हे ज्वनेत ताःलाःगु खँ वरिष्ठ प्रहरी उपरीक्षक उत्तमराज सुवेदी धयादीगु खः । प्रहरीं थ्व घटनाय् संलग्न काभ्रे पाँचखाल छेँ जुयाः कालिमाटीइ च्वनाच्वंम्ह १९ दँया सुवास श्रेष्ठ, अन हे च्वनीम्ह १९ दँया कुमार तामाङ, १८ दँया मनिष घिमिरे, २१ दँया अन्जन बराल, बाग्लुङ गलकोटया २५ दँया सुमन पौडेल व सिन्धुपाल्चोक ज्यामिरे छेँ जुयाः येँय् च्वनाच्वंम्ह ३० दँया गोविन्द घिमिरेयात ज्वंगु खः ।

उमिसत बैंकिङ्ग कसुरय् मुद्दा दर्ता यानाः अनुसन्धान सुरु जूगु खँ धाःगु दु । प्रहरीं्र उमिगु पाखें नगद १८ हजार ५०० लिसें थीथी मनूतय् नागरिकताया प्रतिलिपि २९० पाः, सयौं मनूतय् बैंकय् च्वंगु ध्यबा उल्लेख यानातःगु २६ गू हाजिरीखाता चायेकेत फोटो तिकातःगु २०० पाः फारम, थीथी मनूतय् बैंक स्टेटमेन्ट १९५ गू, थीथी मनूतय् नामय् जनता बैंकया ५७ पा चेकबुक बरामद याःगु दु ।

अथेहे ज्योति बैंक, एभरेस्ट बैंक, माछापुच्छ«े बैंक, मुक्तिनाथ बैंक, एनआइसी एशिया बैंकया दर्जनौ चेकबुक नं लुइकूगु दु । अथेहे उमिगु पाखें ८२५ म्हेसिगु फोटो, एनआइसी एशिया बैंकया ८२ पा व मेमेगु न्हय्गू बैंकया यानाः ८९ पा एक्टिभ जुयाच्वंगु एटिएम कार्ड नं बरामद याःगु खः । थुकिया लिसें चेक हिलेत ठिक्क यानाः च्वयातयेधुंकूगु ३२९ पा चेक नं प्रहरीं बरामद याःगु खः ।

परिसरया प्रहरी नायब उपरीक्षक होबिन्द्र बोगटीं उमिसं खातावालया फुक्क विवरण म्हसीका नक्कली हस्ताक्षर यानाः ध्यबा लिकाःगु खँ धाःगु दु । ‘सामान्यत निगू स्वंगू लाख ध्यबा लिकाःसां नं बंैकं खातावालयात फोन याइ, तर थ्यंमथ्यं झिगू लाख लिकातं नं खातावालयात जानकारी मबिउगुलिं कर्मचारीया हे मिलेमतो दुगु आशंकाय् अनुसन्धान सुरु जूगु दु’ बोगटीं धयादीगु दु ।

वय्कःया कथं न्हिछियंकया गतिविधि स्वयाः चान्हय् उमिगु नक्कली हस्ताक्षर यायेगु सयेकेगु यानाच्वंगु खः । हस्ताक्षर यायेत छ्यलातःगु दर्जनौं हाजिरीखाता नं बरामद याःगु दु । प्रहरीं उमिसं मेमेपिनिगु खातां नं थथे हे यानाः ध्यबा लिकायेधुंकूगु अनुमान याःगु दु ।

सम्बन्धित बुखँ

LEAVE YOUR COMMENTS