रेष्टुरेन्टय् सेवा शुल्क खारेज यात

येँ – आवंलि रेष्टुरेन्टय् नःवनेबलय् १० प्रतिशत सेवा शुल्क पुलेम्वाःलीगु जूगु दु । रेष्टुरेन्ट एण्ड बार एशोसियसन नेपाल (रेवानं) ग्राहकतय् पाखें म्हयेगु यानाच्वंगु सेवा शुल्क खारेज यायेवं रेष्टुरेन्टय् नःवनीपिंत ध्यबा दंक लायेत्यंगु खः । सोमवाः बहनी तक च्वंगु रेवानया बैठकं सेवा शुल्कं यानाः रेष्टुराँय् नःवःपिं हे म्हो जुयाच्वंगु धासें खारेज यायेगु निर्णय याःगु खः ।

रेवानया महासचिव अरनिको राजभण्डारीया कथं आवंलि रेवानलिसे आवद्ध रेष्टुराँतय्सं बुलुहुं सेवा शुल्क चिइकेगु याइ । सेवा शुल्कं यानाः रेष्टुराँय् नःवइपिं ग्राहकतय्सं अप्वः ध्यबा पुले मालाच्वंगु धासें रेवानं थ्व सेवा शुल्क चिइकेगु क्वःछिउगु खँ वय्कलं धयादिल । ‘सेवा शुल्कं यानाः रेष्टुराँया बजाः तब्याकेत हे समस्या जुयाच्वंगु खः ।

आः थुकिया खारेजीं रेष्टुराँया बजाः बुलुहुं तब्या जुया वनी’ वय्कलं धयादीगु दु ।रेवानय् थौंकन्हय् येँया निसःगू, पोखराया सत्यागू व सौराहया ७० गू रेष्टुराँ आवद्ध जुयाच्वंगु दु । रेवानं वंगु खुला न्ह्यव निसें सेवा शुल्क खारेज यायेत पहल यानाच्वंगु खः । मेखे मजदुर संगठनतय्सं धाःसा रेवानया थ्व निर्णयया विरोध यानाच्वंगु दु ।

मजदूर संगठनतय्सं रेवानयात थ्व निर्णय याके मबिइगु नितिं ताःई न्ह्यव निसें दबाब बियाच्वंगु खःसा श्रम कार्यालयय् मुद्दा नं दर्ता यानातःगु दु । माओवादी सम्वद्ध मजदूर संगठनया लिसें मेमेगु मजदूर संगठनतय् दबाबं सन् २००६ निसें होटलतय्सं सेवा शुल्क कायेगु सुरु याःगु खः ।

थौंकन्हय् थुकथं म्हयाच्वंगु सेवा शुल्क मध्ये ७२ प्रतिशत श्रमिकतय्त, ३३ प्रतिशत प्रतिष्ठानयात, २ प्रतिशत होटल संघयात व ३ प्रतिशत स्वंगू केन्द्रीय ट्रेड युनियन संघयात बीगु याना वयाच्वंगु दु ।