बँपसः चीकेवं व्यापारय् लिच्वः
दिलिप शाहीपाखें
येँ- येँ महानगरपालिकां बँपसः चीकेगु ज्या याःगुलिं उकिया लिच्वः येँया होलसेल बजारय् लाःगु दु । येँया २१ वडाय् च्वंगु वसःया होलसेल पसलय् थौं कन्हय् ब्यापार मदुगु खँ पसः थुवाःतय्सं धाःगु दु । मोजा गन्जी सामानया होलसेल यानाच्वंम्ह व्यापारी श्याम श्रेष्ठं येँ मनपां बँपसः चीकेवं उकिया लिच्वः थःपिनिगु व्यापारय् लाःगु खँ कनादिल ।
वय्कःया थुकथंया होलसेल ज्वलं उपभोग याइपिं विशेष यानाः चीधंगु व्यापार व्यवसाय याइपिं मनूत खः । उमित सतकय् पसः तयेके मबीवं उकिया लिच्वः थ्व होलसेल पसःयात लाःगु खः । थौंकन्हय् व्यापार मदयाः त्यासा पुलेत तकं थाकुयाच्वंगु खँ नं वय्कलं कनादिल ।
वय्कलं धयादिल, ‘थौंकन्हय् गुलिखे सहकारीत समस्याय् लाना– च्वंगुया छता कारण बँपसः तयेके मबिउगुलिं नं खः । बँ पसः तइपिंसं भचा भचा ध्यबा मुंकेगु थाय् सहकारी खः । बँ पसः तयेके मबीवं सहकारीइ ध्यबा दुहां वइगु नं म्हो जुल । उकिं यानाः सहकारीइ ध्यबा मदया वन ।’
स्वनिगलय् जक छगू लाख स्वयां अप्वः बँ पसः तइपिं दुगु खँ कँसें श्रेष्ठं थथे छक्वलं बँ पसः चीकेगु पाय्छि मजूगु बिचाः नं तयादिल । येँ मनपां बँ पसःयात व्यवस्थित याःगु खःसा छुं भचा जूसां बेरोजगारी म्हो जुइगु बिचाः तसें वय्कलं बँपसः तइपिं उलिमछि मनूत आः अलपत्रय् लाःगु खँ नं कनादिल ।
अथे हे बँ पसः चीकूगुया लिच्वः फलफूल बजारय् नं लानाच्वंगु दु । न्हापा न्हापा लँय् हे फलफूल तानाः मीगु खःसा आः लँय् पसः तयेके मबीवं उकथंया व्यापार म्हो जूगु खँ कुलेश्वर फलफूल बजारया व्यापारी हेमबहादुर अधिकारीं कनादिल ।
वय्कःया कथं थौंकन्हय् विशेष यानाः मेवा व खरबुजाया सिजन खः । मनूतय्सं छग्वलं हे मेवा वा खरबुजा न्यानाः नयेगु याइ मखु । अप्वःसां बँ पसः तयाच्वंपिं फलफूल व्यापारीतय्के हे न्यानाः नइगु खः । आः उपिं मदुगुलिं फलफुलया ब्यापार नं म्हो जूगु अधिकारीं कनादिल । तांन्वःगु इलय् खरबुजा नइपिं आपालं दइगु खःसां आः बँपसः मदयाः खरबुजाया व्यापारय् नं मन्दी वयाच्वंगु खँ वय्कलं कनादिल ।
अथे हे बजारय् खा व खसीया ला नइपिं नं अप्वः यानाः थथे हे बँपसः तइपिं व्यापारीत खः । आः बँपसः हे चीका छ्वःगु कारणं थज्याःगु लाया व्यापार नं म्हो जुया वंगु खँ सम्बद्ध व्यापारीतय्सं धाःगु दु ।
येँय् बँपसः तयेके मबीवं पिनें वयाः बँ पसः तइपिं नं गुलिखे येँ देय् त्वःताः पिहां वनेधुंकूगु दु । उमिसं थौंकन्हय् पिने जिल्लाया नगर व सदरमुकाम लागाय् अज्याःगु पसः तयेगु यानाच्वंगु दु । यक्व मनू पिहां वंगुलिं येँय् क्वथा बालं काः वइपिं नं म्हो जुया वंगु खँ धाःगु दु ।
LEAVE YOUR COMMENTS