सरकार व विप्लवया अडानं वार्ता जुइमफुत

येँ – सरकार व नेत्रविक्रम चन्द विप्लव पुचःया दथुइ अनौपचारिक रुपं वार्ता जुयाच्वंसां सरकार व विप्लव पुचलं कयाच्वंगु थःथःगु अडानया कारणं औपचारिक वार्ता जुइ फइगु सम्भावना म्हो जुयाच्वंगु दु । सरकारं वार्ताया निंतिं औपचारिक पौ मबिसें थः जिल्ला स्तरीय कार्यकर्ता नाप जक स्वापू तःगु धासें विप्लव पुचलं असन्तोष प्वंकाच्वंगु दु । लिसें विप्लव पुचलं सरकारं वार्ताया खँ ल्हायेगु यानाच्वंसां नं थः कार्यकर्ता ज्वनेगु क्रम मदिकू धासें तत्काल वार्ताया सम्भावना मदुगु खँ धाःगु दु ।

विप्लव पुचलं वार्ताया वातावरण दयेकेगु खःसा तत्काल थः कार्यकर्तायात ज्वनेगु ज्या दिकेमाःगु, थःगु पार्टीयात तयातःगु प्रतिबन्ध चीकेमाःगु लिसें औपचारिक रुपं थःपिंत पौ च्वयेमाःगु माग याना वयाच्वंगु दु । वार्ताया खँ जुयाच्वंगु इलय् विप्लवया स्वनिगः इन्चार्ज माइला लामायात ज्वंगुलिं सरकारं वार्ताया त्वह तयाः पार्टीया उच्च स्तरीय नेतात ज्वनेगु रणनीति ज्वनाच्वंगु खँ नं विप्लव पुचलं धाःगु दु । सरकारं थज्याःगु ज्या मदीकूतले वार्ताया वातावरण जुइ मफइगु खँ नं उमिसं धाःगु दु ।

विप्लव पुचलं थःपिंत आत्मसमर्पण याकेगु रणनीति कथं सरकार न्ह्याः वनाच्वंगु धासें अज्याःगु रणनीति थःपिंत मान्य मजुइगु खँ धाये धुंकूगु दु । मेखे सरकारं धाःसा विप्लव पुचलं गुगु माग न्ह्यःने तयाः वार्ताया खँ हयाच्वंगु दु उकियात कयाः सरकारी पुचः विश्वसनीय मजूगु खँ धाःगु दु ।

सरकारया प्रवक्ता गोकुल बास्कोटां पार्टीयात वैधानिकता बीगु व थः नेता कार्यकर्तायात त्वःतेधुंकाः थःगु शक्ति बल्लाकेगु योजना विप्लव पुचलं कयाच्वंगु धासें उमिात विश्वास याये मफइगु खँ धायेगु यानाच्वंगु दु ।
तर निगुलिं पुचलं अनौपचारिक रुपं वार्ता जुयाच्वंगु खँ धाःसां स्वीकार याःगु दु । मेखे सरकारी पक्षं ज्वनातःम्ह विप्लव पुचःया उच्च तहया नेता हेमन्तप्रकाश ओलीलिसे नेकपाया महासचिव विष्णु पौडेल व गृहसचिव प्रेमकुमार राई बिस्कं बिस्कं नापलानाः वार्ता याःगु खँ यात कयाः नं विप्लव पुचलं असन्तोष प्वंकूगु दु ।

सम्बन्धित बुखँ

LEAVE YOUR COMMENTS