लुम्बिनी विकास कोषया नवनियुक्त सदस्य सचिवपाखें पदभार ग्रहण

येँ (नेपालभाषा टाइम्स) – लुम्बिनी विकास कोषया नवनियुक्त सदस्य सचिव सानुराजा शाक्यं पदभार ग्रहण यानादीगु दु। पदभार ग्रहण यानादिसें नवनियुक्त सदस्य सचिव शाक्यं लुम्बिनी गुरुयोजना इलय् हे सिधयेकेगु प्रतिबद्धता प्वंकादीगु दु ।

सरकारं छुं दिं न्ह्यः जक वय्कःयात लुम्बिनी विकास कोषया सदस्य सचिव नियुक्त याःगु खः । प्यदँया निंतिं नियुक्त जुयादीम्ह सदस्य सचिव शाक्यं वंगु बुधवाः कोषया केन्द्रीय ज्याकुथिइ थःगु पदभार ग्रहण यानादिसें लुम्बिनीयात स्मार्ट लुम्बिनी दयेकेत थम्हं योजनाबद्ध रुपं ज्या यायेगु प्रतिबद्धता नं प्वंकादीगु खः ।

कोषं वय्कःयात लसकुस यायेकथं तःगु ज्याझ्वलय् कोषया उपाध्यक्ष भिक्षु मैत्तेयं प्यंगू दशक न्ह्यः हे शुरु जूगु लुम्बिनी गुरुयोजना इलय् सिधयेकेत व लुम्बिनीया गरिमायात अझ अप्वः प्रभावकारी यायेत सदस्य सचिव शाक्यया नियुक्तिं विशेष भूमिका म्हितीगु विश्वास प्वंकादिल । कोषया सूचना अधिकारी ज्ञानिन राईं वंगु स्वदँ न्ह्यवंनिसें कोषय् गबलें निमित्त, गबलें कायममुकायकथं सदस्य सचिवं जिम्मेवारी कःघाना वयाच्वंगुलिं ज्या यायेत थाकुयाच्वंगु व प्रभावकारी रुपं ज्या न्ह्याके मफयाच्वंगु खँ कमनादिल ।

कोषया नवनियुक्त सदस्य सचिव शाक्य नेपालभाषा आन्दोलनया कार्यकर्तालिसें बौद्ध अध्ययन व समसामयिक विषयय् थःगु च्वसा नं न्ह्याका वयाच्वंम्ह व्यक्तित्व खः ।