ने. सं. ११४४ ञलाथ्व दशमी -

उर्जा मन्त्रालय व लगानी बोर्ड कचवं

येँ – नेपालय् विदेशी लगानी मवःगु मखु । लगानी याये धकाः वइपिंत नं ज्या याये तसकं थाकुल धइगु गुनासो वयाच्वंगुलिं ततःधंगु परियोजनाय् लगानी याः वइपिंत अःपुइमा धकाः सरकारं यक्व अधिकार बियाः लगानी बोर्ड गठन याःगु खः । तर थ्व लगानी बोर्ड वयेवं थःपिंसं यानाच्वनागु ज्याय् हस्तक्षेप जुल धासें थीथी मन्त्रालयतय्सं गुनासो यायेगुया नापनापं आः वयाः बोर्डयात हे पंगु दयेकेगु ज्या समेत सुरु याना हःगु दु ।

थ्वहे झ्वलय् आः नकतिनि कानून मन्त्रालयं छगू सुचं जारी यासें आवंलि ५०० मेगावाट स्वयां च्वय्या जलविद्युत सञ्चालनय् सुनां लगानी यायेगु खःसा लगानी बोर्ड मखु उर्जा मन्त्रालय मार्फत वयेमाः धकाः निर्णय याना बीवं लगानी बोर्डं उकी आपत्ति क्यंगु दु ।५०० मेगावाट स्वयां च्वय्या जलविद्युत परियोजनाया सर्वेक्षण व अनुमतिपत्र बीगु अधिकार समेत उर्जा मन्त्रालययात प्रदान याना बिउगु खः । थुकिं यानाः थौंकन्हय् चर्चाय् वयाच्वंगु अप्पर कर्णाली, भेरी थेंज्याःगु परियोजना उर्जा मन्त्रालयय् वनीगु जूगु दु ।कानून मन्त्रालयं जारी याःगु सुचंपाखें उर्जा मन्त्रालय धाःसा लय्ताःगु दु ।

तर लगानी बोर्डं धाःसा थज्याःगु निर्णयया कारणं बोर्ड पंगु जुइगु खँ न्ह्यथँसें आः देशय् बोर्डया ज्या छु धइगु खँ स्पष्ट यायेमाःगु माग याना हःगु दु । लिसें आः गठन जुइगु न्हूगु सरकारं पुलांगु कानूनत खारेज यानाः बोर्डयात हे बल्लाकेगु कथं न्हूगु कानून दयेकेमाः धकाः नं बः बियाहःगु दु ।ततःधंगु जलविद्युत, उद्योग आदि क्षेत्रय् लगानी याइपिंत लगानी बोर्डं मेथाय् गनं वनाच्वने म्वायेक छक्वलं अनुमति बीगु जूगुलिं लगानी याइपिंत अःपुयाच्वंगु खः । तर थुकिं यानाः सम्बद्ध मन्त्रालयया पदाधिकारीतय्सं कमिशन नये मखनीगु जूगुलिं उमिसं बोर्डं थःपिनि ज्याय् हस्तक्षेप यात धकाः विरोध याना वयाच्वंगु खः ।