बुंगद्यःया जात्रा दित, देगः पुनःनिर्माण न्ह्यात

यल (नेपालभाषा टाइम्स) – बुंगद्यःया जात्रा यायेगु निंतिं रथ दयेकेगु ज्या जोडतोडं यानाः पूवंकूसां अन्तिम इलय् द्यः रथय् बिज्याकेगु ज्या मजुल । बुंगद्य रथय् बिज्याकेगु बांलाःगु दिं धकाः असार २४ गते क्वःछिनातःगु व द्यः रथय् बिज्याकेत जुयाच्वंगु तयारीया हे झ्वलय् गुथि संस्थानं द्यः रथय्बि ज्याकेगु व थ्व सम्बन्धी ज्यात स्थगित निर्णय जूगु परिपत्र याःगु खः ।

छखे बुंगद्यःया जात्राया निंतिं रथ दयेकाः द्यः बिज्याकेगु ज्या दिउसां उखे बुंगस्थित बुंगद्यःया देगः पुनःनिर्माण यायेगु ज्या शुरु जूगु दु। थनिं न्यादँ न्ह्यः भुखाचं पाःताः जुइक दुना क्षतिग्रस्त बुंगद्यःया देगः हाकनं पुनःनिर्माण शुरु जूगु खः । लिपांगु इलय् बुंगद्यःया देगःया पुनःनिर्माण यायेगु ज्या उपभोक्ता समितिपाखें शुरु जूगु खः ।

बुंगद्यः देगः पुनःनिर्माण याये स्वयां न्ह्यः वंगु असार २० गते छगू क्षमा पुजा याःगु खः । क्षमा पुजा लिपा वंगु सोमवाःनिसें देगः पुनःनिर्माणया ज्या न्ह्याःगु उपभोक्ता समितिय अध्यक्ष अमिर शाक्यं जानकारी बियादिल ।

बुंगद्यःया देगः पुनःनिर्माणया निंतिं यल महानगरपालिकाया सिफारिसय् गठन जूगु उपभोक्ता समितिलिसे पुरातत्व विभागं थ्व हे वंगु असार १५ गते सम्झौता यानाः पेश्की वापत समितियात ४० गू लख पेश्की उपलब्ध याकूगु खः ।

गः पुनःनिर्माणया ज्या न्ह्याके स्वयां न्हापां देगः परिसरय् छचाःखेरं न्यनाच्वंगु निर्माण सामग्री मिले यायेगु व ल्वहंया थां मुंकेगुलिसें सिँकःमि व दँकःमिनापं मेमेपिं निर्माणकर्मितलिसे नं समितिं सहलह याःगु खः ।

समिति व विभाग दथुइ जूगु सम्झौताकथं वइगु २०७८ असार १५ गते दुने देगः दने सिधयेकेमाःगु जुइ । बुंगद्यःया देगः स्वंगू करोड च्यागू लख लागतय् पुनःनिर्माण यायेमाःगु दुसा पुनःनिर्माणया प्राविधिक रेखदेख राष्ट्रिय पुनःनिर्माण प्राधिकरणं याइ ।

देगः पुनःनिर्माणया प्राविधिक रेखदेखया निंतिं प्राधिकरणया कार्यकारी समितिया सदस्यया नेतृत्वय् यल महानगरपालिका, सम्बन्धित वडा व पुरातत्व विभाग, बुंगमति क्षेत्र पुनःनिर्माण तथा विकास समितिया प्रतिनिलिसें विज्ञसहितया छगू समिति नं गठन याःगु दु ।

न्यादँ न्ह्यः भुखाचं क्षति जूगु उगु देगः थ्व स्वयां न्ह्यः श्रीलंका सरकारया आर्थिक ग्वाहालिइ निर्माण कम्पनीं ठेक्का कयाः पुनःनिर्माणया ज्या न्ह्याकूगु खः ।  तर क्वःछिनातःगु इलय् देगः पुनःनिर्माणया ज्या न्ह्याः वने मफयेवं जनप्रतिनिधि व स्थानीवासीया सुझावकथं उपभोक्ता समिति गठन यानाः पुनःनिर्माणया ज्या न्ह्याकूगु खः ।

सम्बन्धित बुखँ

LEAVE YOUR COMMENTS