ने. सं. ११४४ कौलाथ्व सप्तमी - फूलपाती

पोखरेलयात कार्यवाहक त्वःतीगु सम्भावना

येँ – प्रधान–मन्त्री केपी ओलीं थः ताःहाकः उपचारया लागिं विदेश भ्रमणय् वने मालीगु इलय् उपप्रधानमन्त्री ईश्वर पोखरेलयात हे कार्यवाहक प्रधानमन्त्रीया जिम्मा बिया थकेगु बिचाः यानादीगु संकेत पिहां वःगु दु । वय्कलं आः नकतिनि यानादीगु थः सल्लाहकारपिनि हिलाबुलापाखें थुकिया संकेत पिहां वःगु खँ सूत्रं धाःगु दु ।

प्रधानमन्त्री ओलीं थः प्रेस सल्लाह–कार डा. कुन्दन अर्यालयात चीकाः पार्टीया प्रचार विभागया उपप्रमुख सूर्य थापायात नियुक्त यानादीगु खः । थापा ओली पक्षयाम्ह मखु । वय्कः उपप्रम पोखरेल पक्षधर खःसा छगू इलय् वय्कः उपप्रम पोखरेलया नं प्रेस सल्लाहकार जुयादीधुंकूम्ह खः ।

प्रम ओलीं वय्कःयात प्रेस सल्लाहकार नियुक्त यानादीगुया अर्थ आः थ्वयां लिपा पोखरेलयात हे कार्यवाहक प्रमया जिम्मा बीत्यंगुया तयारी खः धया हःगु दु । कन्हय् उपप्रम पोखरेलया ल्हातय् ‘कार्यवाहक प्रम’ या जिम्मेवारी वल धाःसा पोखरेलं सल्लाहकारत चीकेत थाकुइ धकाः आः हे उकिया व्यवस्था याना थकेत्यंगु अनुमान याना हःगु दु ।

प्रम ओलीं थः विदेशय् उपचार याकः वनेगु इलय् पार्टीया महासचिव बिष्णु पौडेलयात सरकारय् हयाः कार्यवाहक बिया थकेगु बिचाः यानादीगु खः । तर पौडेलं थः पार्टीइ हे च्वनेगु धासें सरकारय् दुहां वनेत अनिच्छा प्वंकादीगुलिं प्रम ओलीं पोखरेलयात हे कार्यवाहक बिया थकेगु बिचाः यानादीगु खँ सूत्रं धाःगु दु ।

प्रम ओलीयात चिकित्सकतय्सं आः जलस्येँ (किड्नी) हे प्रत्यारोपण याये मालीगु सुझाव बिउगुलिं प्रम ओलीं उकिया तयारी यानादीगु खः । वय्कः आःया पालय् जलस्येँ प्रत्यारोपण यायेत अमेरिका वनीगु सम्भावना दुगु खँ सूत्रं धाःगु दु । थ्व पालय् वय्कः ३ निसें ४ महिना विदेशय् च्वने मालेफु । स्वास्थ्य अवस्थाया कारणं वय्कःयात आराम कायेत सल्लाह वःगु खःसां वय्कलं आराम धाःसा मकाइगु खँ धाःगु दु ।