प्रदेश व स्थानीययात अधिकार बीगु प्रमया बचं
येँ (नेपालभाषा टाइम्स)- प्रधानमन्त्री पुष्पकमल दाहालं प्रदेश व स्थानीय तहयात अधिकार सहित बल्लाकेगु खँ धयादीगु दु । म्हिगः तनहुँया आँबुखैरेनी अस्पतालया उलेज्या यासें प्रधानमन्त्री दाहालं संविधानं परिकल्पना याःगु फुक्कं अधिकार क्वय्या तहया सरकार तक थ्यंकेगु प्रतिबद्धता प्वंकादीगु खः ।
क्वय्या तहलय् अधिकार मथ्यनेवं संघीयता असफल जुल धकाः धाये मजिउ धासें वय्कलं संविधानयात संस्थागत यायेगु प्रक्रिया न्ह्यानाच्वंगु खँ धयादिल । संघीयता जनताया हितय् दु धइगु प्रमाणित यायेगु कुतः जुयाच्वंगु धासें वय्कलं संघीयता मेपिंसं स्वयां थम्हं अप्वः थूगुलिं उकियात बल्लाकेत थः न्ह्यानाच्वनागु खँ नं धयादिल ।
प्रदेश सरकारयात बल्लाकेत प्रहरी समायोजन ऐन, निजामती ऐन व शिक्षा ऐन माःगु धासें वय्कलं धयादिल, ‘थ्व ऐन दुसा जक प्रदेश सरकार बल्लाइ, मखुसा बल्लाइ मखु । प्रदेश सरकार दुगु अनुभूति जनतायात बी मफुत धाःसा प्रदेशया महत्व बारे थुइके फइमखु ।’ वय्कलं स्वंगुलिं ऐन कार्यान्वयनय् वइगु खँ धासें छुं न्हिया दुने हे प्रहरी समायोजन ऐन कार्यान्वयनय् वइगु खँ नं स्पष्ट यानादिल ।
उकथं हे प्रधानमन्त्री दाहालं जनताया तःधंगु संघर्ष व बलिदानं वःगु अधिकार लाकेगु कुतः जुयाच्वंगु दु धासें छप्पँ जुयाः उकियात परास्त यायेगु खँ नं धयादीगु दु । नेपाःमि जनतां तःधंगु संघर्ष व बलिदान याःगुलिं देशय् उत्पीडित वर्ग, जाति, क्षेत्र, लिंगं अधिकार कायेफुगु खः धासें वय्कलं १२ बुँदे समझादारीया पक्षधर शक्ति परिवर्तनया रक्षा यायेत छथाय् च्वनाच्वंगु खँ नं कनादिल ।
उकथं हे प्रधानमन्त्री दाहालं अर्थतन्त्रय् सुधार वयाच्वंगु दावी यासें थम्हं सरकारया नेतृत्व यानाच्वनागु इलय् हाथ्यां जाःगु अवस्था दुसां नं आः अर्थतन्त्रय् बांलाक सुधार वयाच्वंगु तर दबाब मुक्त धाःसा जुइ मफयाच्वंगु खँ कनादिल । वय्कलं मंसिर ४ गते थम्हं अर्थतन्त्र सुधार यायेगु नितिं बृहत बैठक सःतागु धासें उगु बैठकय् अर्थतन्त्रयात गति बीगु विषयय् गम्भीर सहलह यानाः ठोस प्याकेज घोषणा जुइ फइगु खँ नं कनादिल ।
LEAVE YOUR COMMENTS