जानकी मन्दिर विश्व सम्पदाय्

येँ – स्वनिगःया थीथी ऐतिहासिक, सांस्कृतिक, पुरातात्विक व पौराणिक महत्वया सम्पदास्थल लिपा आः जनकपुरया जानकी मन्दिरयात नं विश्व सम्पदाया धलखय् दुथ्याकीगु जूगु दु । विश्व सम्पदाया धलखय् लानाच्वंगु व भुखाचं क्षति जुयाः पुनःनिर्माण सुस्त जुयाच्वंगु धासें संयुक्त राष्ट्र संघया निकाय युनेस्कों अज्याःगु सम्पदायात हे धलखं चिइकेगु ख्याच्वः बिया वयाच्वंगु इलय् युनेस्कोया हे छगू प्रतिनिधिमण्डलं जानकी मन्दिरयात विश्व सम्पदाया धलखय् दुथ्याकेगु निंतिं सरोकारवालालिसें सहलह यानादीगु खः ।

युनेस्कोया प्रतिनिधि क्रिष्टन म्यानहर्टं पुरातत्व विभागया पुचःलिसें जनकपुर उपमहानगरपालिकाया प्रमुख लालकिशोर साहलिसें थ्व सम्बन्धय् सहलह यानादीगु खः । युनेस्को प्रतिनिधि म्यानहर्टलिसे जूगु खँल्हाबल्हाया इलय् जानकी मन्दिरयात विश्व सम्पदाया धलयखय् दुथ्याकेत सकारात्मक खने दुसां अझं आपालं प्रक्रिया पूवंकेमानिगु नगरप्रमुख साहं कनादिल ।

जानकी मन्दिरयात विश्व सम्पदाया धलखय् सुचीकृत यायेत पूर्वाधारसम्बन्धी थःत बिउगु व वकथं मेगु आपालं प्रक्रिया पूवंके ल्यं दुगु धासें उकियात याकनं पूवंकेत युनेस्को प्रतिनिधि म्यानहर्टं इनाप यानादीगु
दु ।