तराईया जिल्लाय् समुदायस्तरय् संक्रमण

येँ (नेपालभाषा टाइम्स) – थीथी जिल्लाय् कोरोना भाइरस संक्रमण समुदायस्तरय् न्यनेधुंकूगु संकेत खनेदुगु खँ स्वास्थ्य अधिकारीतय्सं धाःगु दु। स्वास्थ्य तथा जनसंख्या मन्त्रालयं छुं जिल्लाय् समुदायस्तरय् न्यनावंगु संकेत वःसां नं उकियात पुष्टि यायेगु आधार धाःसा मलूगु खँ धाःगु दु। प्रदेश नम्बर २ या गुलिखे जिल्लाय् कोरोना भाइरसया संक्रमणया जोखिम अप्वःगु धासें कफ्र्यु तयेधुंकूगु दु ।

बीबीसी नेपाली सेवाया कथं आः तक बारा, पर्सा व सप्तरी लगायतया जिल्लाय् ‘ट्राभल हिस्ट्री’ मदुपिं व संक्रमितया सम्पर्कय् नं मवःपिं छुं मनूतय्के संक्रमण खनेदुगु दु। नारायणी अस्पतालया मेडिकल सुपरिटेन्डेन्ट मदन उपाध्यायं बीबीसीयात धयादिल, ‘गुलि नं आः न्हूपिं संक्रमित खनेदुगु खः, उपिं फुक्कं थःत हे शंका जुयाः जाँच यायेत वःपिं खः, व उमिके संक्रमण जूगु खनेदु।’ वय्कःया कथं अप्वः धइथें संक्रमित जूपिं समुदाय दुने च्वंपिं हे खः ।

तर पाय्छि लिच्वः कायेगु निंतिं समुदायस्तरय् पीसीआर परीक्षण यायेमाःगु दु, तर नं समुदाय दुने संक्रमण धाःसा न्यने धुंकूगु धायेफइ । पर्साया स्थानीय प्रशासनं म्हिगःनिसें कफ्र्यू हे जारी यायेधुंकूगु दुसा थन निम्ह मनूत कोरोना भाइरस संक्रमणया कारणं सीधुंकूगु दु ।

उकथं हे सप्तरीइ नं छम्ह मनू कोरोना भाइरस संक्रमणया कारणं सीधुंकाः समुदायस्तरय् याःगु परीक्षणय् छुं मनूतय्के संक्रमण खनेदयेवं अन नं कर्फ्यू तया बीधुंकूगु दु। प्रदेश २ या सामाजिक विकास मन्त्री नवलकिशोर साह सुडीं सप्तरीइ समुदायस्तरय् संक्रमण न्यनेधुंकूगु खनेदुसां नं पाय्छि लिच्वः मवःनिगु खँ धयादीगु दु। वय्कलं प्रदेशया थीथी जिल्लाय् समुदायस्तरय् सामूहिक रुपं पीसीआर परीक्षणया ज्या न्ह्याकेधुनागु व अथे खःसां नं माक्व स्रोत व साधन मदुगु खँ कनादिल ।

स्वास्थ्य मन्त्रालयया कथं स्वनिगलय् संक्रमणया जोखिमयात ध्यानय् तयाः आः सरकारं पिनें वइपिं मनूतय् परीक्षण यायेगु तयारी यानाच्वंगु दु। मन्त्रालयया कथं म्हिगः व थौं स्वनिगलय् दुहां वइपिं झिद्वः मनूतय्गु स्वाब कायेगु योजना दयेकातःगु दु ।