नेप्से दोहोरो अंकं थहां वन
येँ – मदिक्क कुहां वनाच्वंगु शेयर बजाः सोमवाः दोहोरो अंकं थहां वंगु दु । सोमवाः नेप्से परिसूचक १३.७७ अंकं थहां वनाः १ हजार १४५.५७ अंकय् थ्यंगु दु । समग्र शेयर बजाःया मापन याइगु नेप्से परिसूचक ताःई लिपा थुकथं दोहोरो अंकं थहां वंगु खः । अथेहे ‘क’ वर्गया कम्पनीतय् मापन याइगु सेन्सेटिभ परिसूचक नं ३.२८ अंकं थहां वंगु दु ।
सोमवाः नेप्से परिसूचक जक मखु कारोवार रकम नं थहां वंगु दु । सोमवाः जक १७३ गू कम्पनी ५४ करोड ९९ लाख ९८ हजार २४१ तका बराबरया १९ लाख ९५ हजार ४८ कित्ता शेयर न्यायेमी जूगु खः । स्टकया कथं कारोवार जूगु ११ उपसमूहमध्ये अन्य उपसमूहया जक परिसूचक कुहांवंगु खः ।
सोमवाः बैंकिङया १२.३१, होटलया ३१.९३, विकास बैंकया १३.३२, जलविद्युत्या १२.८५, वित्तपाखे २.०७, निर्जीवन बीमाय् ६७.५३, उत्पादनया ५५.७१, लघुवित्तया ३०.७५, जीवन बीमाया ७९.०२ व सामूहिक लगानी कोषया परिसूचक ०.०१ अंकं थहां वंगु खः ।म्हिगः कारोवार दांया ल्याखय् एनएमबी बैंक शीर्षस्थानय् लात ।
एनएमबीया सोमवाः जक १३ करोड ९२ लाख १० हजार १९५ तकाया शेयर न्यायेमी जूगु खः । थ्व धुंकाः छसिकथं प्रभु बैंकया ७ करोड ३३ लाख ६८ हजार ३०२ तकाया, माछापुच्छ्रे बैंकया ३ करोड ५९ लाख ३८ हजार ३०७ तकाया, प्रभु बैंकया संस्थापक शेयर ३ करोड २१ लाख ३३ हजार २४ तकाया, प्राइम बैंकया २ करोड १३ लाख ३ हजार ५८८ तकाया व नेपाल बैंकया १ करोड ७६ लाख ६३ हजार ५३० तकाया शेयर कारोवार जूगु खः ।
म्हिगःया कारोवारय् हिमालयन डिस्टिलरीया शेयरधनीतय् ९.९७ प्रतिशतं लबः काःगु दु । सबैको लघुवित्त वित्तीय संस्थाया लगानीकर्तां ९.८९, रिडी हाइड्रोपावरया लगानीकर्तां ९.७२, आँखु खोला जलविद्युत् कम्पनीया लगानीकर्तां ९.४३, राधी विद्युत् कम्पनीया लगानीकर्तां ९.०२ व एनएमबी बैंक लगानीकर्तां ७.५८ प्रतिशतं कमे याःगु खः ।
मेखे एनआइबिएल समृद्धि फन्डया लगानीकर्तां ५.७७, खानीखोला जलविद्युत् कम्पनीया लगानीकर्तां ३.५७, सिटी एक्सप्रेस फाइनान्सया लगानीकर्तां १.९६, हिमालयन ऊर्जा विकास कम्पनीया लगानीकर्तां १.९४ व मेगा बैंकया संस्थापक शेयरया लगानीकर्तां १.९२ प्रतिशतं द्यापं फयेमाःगु दु ।
LEAVE YOUR COMMENTS