बैंकतय्त हाकनं मर्जर याकेगु तयारी

येँ – राष्ट्र बैंकं हाकनं वाणिज्य बैंकतय् मर्जर यायेगु तयारी यानाच्वंगु खँ सीदुगु दु । न्हापा नं बैंकतय् ल्याः अप्वः जूगु धासें थीथी विकास बैंक व फाइनान्स कम्पनीया मर्जर याके बिउगु खः । वाणिज्य बैंकया चुक्ता पुँजी ८ अर्ब तक थ्यंकेमाःगु नीति कयाः वित्तीय संस्थायात मर्जर वने मायेकाबिउगु खः ।

वाणिज्य बैंकया लक्ष्य कथं ८ अर्ब तका चुक्ता पुँजी थ्यंकेधुंकाः आः ‘बिग मर्जर’या निंतिं नीति दयेकेगु ज्या यानाच्वंगु खँ धाःगु दु । बिग मर्जरया नितिं राष्ट्र बैंकं थीथी बैंकया सञ्चालक समितिया दुजःपिं व प्रमुख कार्यकारी अधिकृत नाप सहलह यायेगु ज्या यानाच्वंगु खँ धाःगु दु ।

थुगु दँया आर्थिक बजेट न्ह्यब्वयेगु ज्या क्वचायेवं सरकारं थुगु दँया मौद्रिक नीति सार्वजनिक यायेगु तयारी यानाच्वंगु खँ धाःगु दु । राष्ट्र बैंकं हःगु पुँजी वृद्धि योजनां वाणिज्य बैंकत मर्जर मजूगुलिं आः वाणिज्य बैंकयात हे लक्षित यानाः बिग मर्जरया तयारी जुयाच्वंगु स्रोतं धाःगु दु । अन्तर्राष्ट्रिय मुद्रा कोषं नेपालय् आपालं वाणिज्य बैंक दुगु धासें उकियात म्हो यायेमाःगु सुझाव बियाच्वंगु दु ।

वाणिज्य बैंक आपाः दयाः अस्वस्थ प्रतिस्पर्धा जुयाच्वंगु धासें उकियात म्हो यायेमाःगु सुझाव बिउगु खः । सरकारं २८ गू वाणिज्य बैंकयात १५ गू दयेकेगु तयारी यानाच्वंगु खँ धाःगु दु । बिग मर्जर यानाः बैंकया ल्याः म्हो यायेवं संस्था बल्लाइगु व वित्तिय मध्यस्थता खर्च नं म्हो जुइगु जूगुलिं मर्जरय् वनेत बैंकतय्त सुझाव बीगु ज्या राष्ट्र बैंकं यानाच्वंगु दु ।