अन्तशुल्क स्टिकर छपाईया बोलपत्र मन्ह्याकेत निर्देशन

येँ – प्रतिनिधि सभा सार्वजनिक लेखा समितिं अन्त शुल्क स्टिक छपाई सम्बन्धी बोलपत्र आह्वान व ओपिसी सिमेन्टया गुणस्तर कायम यायेगु सम्बन्धय् लिपांगु निर्णय तत्काल कार्यान्वयन मयंकेत सरकारयात निर्देशन बिउगु दु ।

अन्त शुल्क कार्यालयं अन्त शुल्क स्टिकर छपाईया निंतिं अन्तर्राष्ट्रिय बोलपत्रय् तयातःगु शर्तया कारणं नेपाली कम्पनीं प्रतिस्पर्धा यायेमफइगु अवस्थाय् वयेवं लाःगु उजुरीइ छलफल यासें समितिं सरकारयात थ्व निर्देशन बिउगु खः । नेपाली कम्पनीं ब्वति कायेफइ कथं आवश्यक कानुन परिमार्जन यायेत समितिं दछि न्ह्यव हे अर्थ मन्त्रालययात निर्देशन बीधुंकूगु दु ।

मन्त्रालयं समितिया निर्देशन बेवास्ता यासें बोलपत्र आह्वान याःगु समितिया धापू दु । नेपाली कम्पनीं छुं नं हालतय् प्रतिस्पर्धा यायेमफइगु शर्त तयाः छक्वलं न्यादँया लागि तःधंगु ल्याखय् स्टिकर छापे यायेत्यंगु धासें समितिं थ्व निर्देशन बिउगु खः ।

स्टिकर छपाई सम्बन्धय् समितिया न्हापाया निर्देशन कार्यान्वयन जू मजू धयागु विषयय् मेगु बैठकय् अर्थ मन्त्रालय व सम्बन्धित पदाधिकारीतय्के जानकारी कायेगु निर्णय नं जूगु खँ समितिया सचिव डा. रोजनाथ पाण्डें धयादीगु दु । स्टिकर छपाईया निंतिं थ्यंमथ्यं स्वंगू अर्ब तका बराबरया बोलपत्र आह्वान याःगु खः ।

थ्व बोलपत्रया कारणं नेपाली कम्पनीतय्सं वइगु न्यादँ क स्टिकर छापे यायेमखनीगु स्थिति सिर्जना जूगु जक मखु तःधंगु ल्याखय् ध्यबा नं विदेश वनीगु स्थिति दुगु खँ समितिं धाःगु दु । नेपाली कम्पनीतय्त हे स्टिकर छापे यायेगु ज्या बीफत धाःसा स्वदेशी उद्योग बांलाइगु व रोजगारी वृद्धि जुइगु खँ समितिया सांसदतय्सं धाःगु दु ।

अथेहे समितिं गुणस्तर निर्धारण परिषदं ओपिसी सिमेन्टय् ताःई न्ह्यवनिसें कायम जुयाच्वंगु गुणस्तर मापन आकाझाकां खुकुलो याःगु सम्बन्धय् नं उद्योग मन्त्रालयया पदाधिकारीतय्के जानकारी माःगु याःगु दु ।