ने. सं. ११४४ कछलागा तृतीया -

२७ वडाया भवन विवाद अदालत यंकेगु तयारी

येँ – येँ मनपा २७ वडाया ज्याकू दयेकेत्यंगु ज्याथा त्वाःया छेँया विवाद आः अदालतय् वनीगु संकेत पिहां वःगु दु । वडापाखें ज्याकू दयेकेत्यंगु उगु जग्गाय् नापसं च्वंगु छुस्याबहाःपाखें नं दावी यायेवं थ्व विवाद अदालत थ्यनेत्यंगु खः ।

वडाया ज्याकू तयेत छेँ दनेत्यंगु उगु जग्गाया लालपूर्जा स्थानीय ज्याठा युवा तथा सामुदायिक विकास क्लबया नामय् लानाच्वंगु दु । तर छुस्याबहाःया स्थानीय वज्राचार्य समुदायं धाःसा थ्व जग्गा न्हापा बय्लाछियागु खःसा अन छगू सतः नं दयेमाः धकाः दावी यानाच्वंगु दु । थज्याःगु सम्पदास्थल जुयाच्वंगु थाय्या लालपूर्जा छगू क्लबया नामय् गय् यानाः लाः वन धइगु खँय् थःपिंसं छानबिन यानाच्वनागु व उकिया विरुद्ध अदालतय् मुद्दा तयेगु तयारी यानाच्वनागु खँ छुस्याबहाःया पदाधिकारीपिंसं धाःगु दु ।

स्थानीय सम्पदा अभियन्यता शैलेश वज्राचार्यं आः वडां ज्याकू दयेकेत्यंगु जग्गा स्थानीय जनतां छ्यला वयाच्वंगु छगू खुल्ला थाय् जूगु कारणं उकियात खुल्ला हे त्वःतेमाः धइगु बिचाः तयादिल । नेपालभाषा टाइम्सलिसे खँ ल्हासें वय्कलं धयादिल, ‘क्लबपाखें २०५४ सालपाखे जक लालपूर्जा काःगु खनेदु, व स्वयां न्ह्यः थ्व जग्गा सुयागु खः ले ? थुकिया छानबिन यात धाःसा अथें सी दइ ।’

उखे जग्गाया लालपूर्जाय् नां दुगु ज्याठा युवा क्लबया नायः चन्द्रमान महर्जनं धयादिल, ‘क्लबं झी हे त्वाःबहाःया हित जुइमा धकाः वडा ज्याकू दयेकेत थ्व पहल यानागु खः, तर वडाया हितया ज्या तकं याके मबिउगु खँय् दुःख तायाच्वंगु दु ।’

क्लबया नामय् जग्गाया लालपूर्जा वःगु खँय् छानबिन जूसा छु याये धयागु नेपालभाषा टाइम्सया न्ह्यसलय् नायः महर्जनं धयादिल, ‘छानबिन याःसा ठीक हे जू, तर छानबिन थुकिया जक मखु छुस्याबहाःया लिउने न्हापा क्यब जुयाच्वंगु जग्गाया लालपूर्जा आः व्यक्तिया नामय् गय् जू वन, उकिया नं छानबिन याना वनेमाः ।’

अन दयेकीगु वडा भवन सम्पदामैत्री जुइगु व थुकिं यानाः छुस्याबहाःया संरक्षण व संवद्र्धनयात अझ अप्वः तिबः जुइगु बिचाः प्वंकुसें वय्कलं वडा भवन दयेकेत्यंगु खँय् स्थानीयवासीयात हे जानकारी मदु धाःगु गलत खः धयादिल । वडा भवनया शिलान्यास कार्यक्रम हे छुस्याबहाः दुने जूगु खँ नं वय्कलं कनादिल ।

उखे अभियन्ता वज्राचार्यं न्हापा गल्ती जूगु खँयात कुलाः आः नं गल्ती याये दयेमाः धायेगु पाय्छि मजूगु बिचाः तयादिल ।